ໃນຕອນເຊົ້າຂອງວັນທີ 4 ມັງກອນ 2024 ແຂວງຊຽງຂວາງ ໄດ້ຈັດຕັ້ງພິທີປາຖະກະຖາ ເພື່ອລະນຶກວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີ ທີ່ຫ້ອງປະຊຸມໃຫຍ່ຫ້ອງວ່າການແຂວງ. ໃຫ້ກຽດປາຖະກະຖາໂດຍສະຫາຍ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າ ຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະຮັບຜິດຊອບຊີ້ນໍາການຈັດຕັ້ງສະເຫຼີມສະຫຼອງ ວັນເກີດ ປະທານ ຄໍາໄຕ ສີພັນດອນ ຂັ້ນສູນກາງ, ເຊິ່ງເຂົ້າຮ່ວມຮັບຟັງມີ ຄະນະປະຈໍາພັກແຂວງ, ກຳມະການພັກແຂວງ, ເລຂາພັກເມືອງ, ຄະນະພັກຮາກຖານ, ຄະນະໜ່ວຍພັກຮາກຖານ, ຫົວໜ້າ-ຮອງຫົວໜ້າ ພະແນກການ, ກົມກອງ, ພະນັກງານ-ລັດຖະກອນ, ລັດວິສາຫະກິດອ້ອມຂ້າງແຂວງເຂົ້າຮ່ວມຟັງທັງໝົດ 274 ຄົນ, ຍິງ 78 ຄົນ.
ໃນພິທີດັ່ງກ່າວ ສະຫາຍ ຄໍາພັນ ເຜີຍຍະວົງ ໄດ້ເລົ່າຄືນຊີວິດເຍົາໄວ ແລະ ຈຸດເລີ່ມຕົ້ນໃນການເຄື່ອນໄຫວປະຕິວັດ ຂອງປະທານ ຄໍາໄຕ ສີພັນດອນ, ຍົກໃຫ້ເຫັນເຖິງການເຄື່ອນໄຫວປະຕິວັດເປັນຕົ້ນແມ່ນເຂົ້າຮ່ວມຂະບວນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ, ຄວາມປີຊາສາມາດ, ຄວາມສະຫຼຽວສະຫຼາດຂອງປະທານ ຄໍາໄຕ ສີພັນດອນ ໃນການຊີ້ນໍາບັນຊາກອງທັບປະຊາຊົນລາວໃນການຕໍ່ສູ້ກູ້ຊາດບໍ່ຍອມຈໍານົນຈົນສາມາດຍາດໄດ້ໄຊຊະນະ ທີ່ສົມບູນ ແລະ ສະຖາປານາປະເທດ ສປປ ລາວ ຂື້ນໃນວັນທີ 2 ທັນວາ 1975 ແລະ ຍົກໃຫ້ເຫັນເຖິງຜົນງານໃນການຊີ້ນໍາ-ນໍາພາໃນໄລຍະພາລະກິດປົກປັກຮັກສາ ແລະ ສ້າງສາພັດປະເທດຊາດໃນແຕ່ລະໄລຍະຈົນເຖິງປັດຈຸບັນ, ລວມທັງວິຖີຊີວິດທີ່ດຸໝັ່ນພາກພຽນ, ແບບແຜນການເຮັດວຽກທີ່ຊັດເຈນ, ການອຸທິດຕົນເພື່ອຊາດ, ເພື່ອປະຊາຊົນເປັນແບບຢ່າງໃນການຮັກສາສຸຂະພາບທີ່ດີ, ເປັນທີ່ຮັກແພງຂອງປະຊາຊົນບັນດາເຜົ່າ.
ຕໍ່ກັບຜົນງານຂອງເພີ່ນນັ້ນ ສະຫາຍ ຄໍາພັນ ເຜີຍຍະວົງ ຍັງໄດ້ສະເໜີໃຫ້ພະນັກງານ-ລັດຖະກອນ, ທະຫານ, ຕໍາຫຼວດ, ປັນຍາຊົນ ແລະ ຄົນຮຸ່ນໝຸ່ມ ຈົ່ງຕັ້ງໜ້າສຶກສາຮໍ່າຮຽນ ແລະ ເສີມຂະຫຍາຍຄຸນງາມຄວາມດີ, ແບບແຜນດໍາລົງຊີວິດຂອງປະທານ ຄໍາໄຕ ສີພັນດອນ ເພື່ອມາໝູນໃຊ້ເຂົ້າການປະຕິບັດໜ້າທີ່ຂອງຕົນ.
ຂ່າວ: ທ້າວ ນູຢ່າງ ຢົງມາ