ຄະນະໂຄສະນາອົບຮົມແຂວງເຄື່ອນໄຫວສາຍຟີມມູນເຊື້ອສໍາຄັນຂອງພັກ, ຂອງຊາດຢູ່ ບ້ານສົບຄາວ
ໃນວັນທີ 28 ກຸມພາ 2024 ທີ່ຜ່ານມາ ຄະນະໂຄສະນາອົບຮົມແຂວງ ນໍາໂດຍ ທ່ານ ວັນນະສິນ ຜະລີຈັນ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍທີມງານ ສົມທົບກັບຄະນະໂຄສະນາອົບຮົມເມືອງ ພູກູດ ໄດ້ນໍາເອົາກອງໂຄສະນາເຄື່ອນທີ່ລົງສາຍຟີມຮູບເງົາຢູ່ ບ້ານ ສົບຄາວ ເມືອງ ພູກູດ ແຂວງຊຽງຂວາງ. ໂດຍການເຂົ້າຮ່ວມຊົມຂອງພໍ່ແມ່ປະຊາຊົນ, ຊາວໜຸ່ມ, ເຍົາວະຊົນບ້ານ ປະມານ 100 ກ່ວາຄົນ.
ໃນການລົງເຄື່ອນໄຫວໃນຄັ້ງນີ້ແມ່ນເພື່ອປະຕິບັດຕາມທິດທາງແຜນວຽກ ຂອງຄະນະໂຄສະນາອົບຮົມແຂວງ ໃນການເຄື່ອນໄຫວສາຍຟິມມູນເຊື້ອທີ່ສໍາຄັນຂອງພັກ, ຂອງຊາດ, ມູນເຊື້ອໃນແຕ່ລະບັ້ນຮົບປົດປ່ອຍຊາດ, ຜົນຮ້າຍຂອງຢາເສບຕິດ, ເສັ້ນທາງລົດໄຟລາວ-ຈີນ ແລະ ສາລະຄະດີຕ່າງໆ ນີ້ກໍ່ເພື່ອເຮັດໃຫ້ ພໍ່ແມ່ປະຊາຊົນ, ຊາວໜຸ່ມ, ເຍົາວະຊົນໄດ້ຮັບຮູ້ຫວນຄືນມູນເຊື້ອໃນການຊີ້ນໍາ-ນໍາພາການຕໍ່ສູ້ປົດປ່ວຍຊາດ, ມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຮໍ່າຮຽນເອົາແບບຢ່າງຄຸນສົມບັດ, ທາດແທ້ປະຕິວັດ, ຄວາມຈົ່ງຮັກພັກດີ, ຄວາມເດັດດ່ຽວໜຽວແໜ້ນໃນແຕ່ລະບັ້ນຮົບເຊັ່ນວ່າ: ມູນເຊື້ອຂອງກອງທັບປະຊາຊົນລາວ, ກອງພັນທີ 2 ຜ່າວົງປິດລ້ອມ ທີ່ທົ່ງໄຫຫີນ, ປຸກລະດົມໃຫ້ຊາວໜຸ່ມເຍົາວະຊົນເຫັນໄດ້ຜົນຮ້າຍຂອງຢາເສບຕິດທີ່ມີຕໍ່ຊີວິດຮ່າງກາຍ ແລະ ຫ່າງໄກຈາກສິ່ງເສບຕິດຕ່າງໆເພື່ອເຮັດໃຫ້ສັງຄົມມີຄວາມສະຫງົບຫຼີກລຽງຈາກການເກີດມີການຂີ້ລັກງັດແງະ, ການອາລະວາດຕີກັນ, ປຸກລະດົມທຸກຊັ້ນຄົນໃນສັງຄົມເປັນເຈົ້າການໃນການປະຕິບັດ 2 ວາລະແຫ່ງຊາດໃນການແກ້ໄຂບັນຫາຢາເສບຕິດ ແລະ ເຮັດໃຫ້ປະຊາຊົນເຫັນໄດ້ການພົວພັນຮ່ວມມືຮອບດ້ານລະຫ່ວາງສອງພັກກໍ່ຄືສອງລັດຖະບານ ລາວ ແລະ ຈີນ ໃນການກໍ່ສ້າງເສັ້ນທາງລົດໄຟຈາກ ສປ ຈີນ ສູ່ ສາທາລະນະລັດ ປະຊາທິປະໄຕ ປະຊາຊົນລາວ; ແມ່ນຍຸດທະສາດແຫ່ງການພັດທະນາປະເທດຊາດຫລຸດພົ້ນອອກຈາກສະຖານະພາບດ້ວຍພັດທະນາ ແລະ ກ້າວເດີນສູ່ຈຸດໝາຍສັງ ຄົມນິຍົມຂອງພັກເຮົາ. ນອກຈາກການສາຍຟິມມູນເຊື້ອນັ້ນ ທ່ານ ວັນນະສິນ ຜະລີຈັນ ຍັງໄດ້ເຜີຍແຜ່ນິຕິກໍາຈໍານວນໜຶ່ງຂອງ ທ່ານ ເຈົ້າແຂວງໆຊຽງຂວາງ ໃນການປ້ອງກັນການຖາງປ່າເຮັດໄຮ່ຊະຊາຍ ສະກັດກັ້ນໄຟໄໝ້ລາມປ່າ, ຫ້າມຈັບຈອງ, ບຸກລຸກ ແລະ ຊື້-ຂາຍສິດນໍາໃຊ້ທີ່ດິນບໍ່ຖືກຕ້ອງ, ປຸກລະດົມໃຫ້ພໍ່ແມ່ປະຊາຊົນໃນການຈູດໄຮ່-ຈູດສວນໃຫ້ມີສະຕິລະວັງຕົວເພື່ອປ້ອງກັນໄຟໄໝ້ລາມປ່າ ແລະ ຫຼີກລຽນການເກີດອະຄີໄພຕ່າງໆ.
ການນໍາເອົາກອງໂຄສະນາເຄື່ອນທີ່ລົງສາຍຟີມມູນເຊື້ອປະຫວັດສາດ ແລະ ສາລະຄະດີຕ່າງໆນັ້ນ; ມັນກໍ່ເປັນຮູບການໂຄສະນາສຶກສາອົບຮົມວຽກງານການເມືອງ-ແນວຄິດທີ່ສໍາຄັນອັນໜຶ່ງ ເຊິ່ງສາມາດເຮັດໃຫ້ຜູ້ຊົມໄດ້ສໍາພັດດ້ວຍຕາ, ເຂົ້າໃຈງ່າຍ, ເປັນການໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ, ປະຊາຊົນບັນດາເຜົ່າ, ຊາວໜຸ່ມ, ເຍົາວະຊົນໄດ້ຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມູນເຊື້ອປະຕິວັດໃນການຕໍ່ສູ້ກູ້ຊາດທີ່ບໍ່ຍອມຈໍານົນຂອງການນໍາຫຸ່ນກ່ອນ ແລະ ການຊີ້ນໍາ-ນໍາພາຂອງພັກເຮົາໃນໄລຍະໃໝ່ ເພື່ອພ້ອມກັນສ້າງສາພັດທະນາປະເທດຊາດໃຫ້ຫຼຸດພົ້ນອອກຈາກຄວາມດ້ອຍພັດທະນາ.
(ຂ່າວ: ນູຢ່າງ ຢົງມາ)