ກອງໂຄສະນາເຄື່ອນທີ່ເຄື່ອນໄຫວສາຍຟີມມູນເຊື້ອປະຫວັດສາດສໍາຄັນຂອງພັກ, ຂອງຊາດ ຢູ່ ບ້ານນາ
ໃນວັນທີ 15 ກຸມພາ 2024 ຜ່ານມາ ຄະນະໂຄສະນາອົບຮົມແຂວງ ນໍາໂດຍ ທ່ານ ຈັນທະບູນ ແພງສົມພູ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍທີມງານ ຄະນະໂຄສະນາອົບຮົມແຂວງສົມທົບກັບຄະນະໂຄສະນາອົບຮົມເມືອງແປກ ໄດ້ນໍາເອົາກອງໂຄສະນາເຄື່ອນທີ່ລົງສາຍຟີມຮູບເງົາຢູ່ ບ້ານນາ ເມືອງແປກ ແຂວງຊຽງຂວາງ. ໂດຍການເຂົ້າຮ່ວມຊົມຂອງພໍ່ແມ່ປະຊາຊົນ, ຊາວໜຸ່ມ, ເຍົາວະຊົນ ບ້ານນາ ປະມານ 100 ກ່ວາຄົນ.
ຈຸດປະສົງໃນການລົງເຄື່ອນໄຫວໃນຄັ້ງນີ້ແມ່ນເພື່ອປະຕິບັດຕາມທິດທາງແຜນວຽກປະຈໍາປີ ຂອງຄະນະໂຄສະນາອົບຮົມແຂວງໃນການເຄື່ອນໄຫວສາຍຟິມມູນເຊື້ອທີ່ສໍາຄັນຂອງພັກ, ຂອງຊາດ, ມູນເຊື້ອໃນແຕ່ລະບັ້ນຮົບປົດປ່ອຍຊາດ, ຜົນຮ້າຍຂອງຢາເສບຕິດ ແລະ ສາລະຄະດີຄອບຄົວຕົວແບບໃນການປູກການລ້ຽງ ນີ້ກໍ່ເພື່ອເຮັດໃຫ້ ພໍ່ແມ່ປະຊາຊົນ, ຊາວໜຸ່ມ, ເຍົາວະຊົນໄດ້ຮັບຮູ້ຫວນຄືນມູນເຊື້ອໃນການຊີ້ນໍາ-ນໍາພາການຕໍ່ສູ້ປົດປ່ວຍຊາດ, ມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຮໍ່າຮຽນເອົາແບບຢ່າງຄຸນສົມບັດ, ທາດແທ້ປະຕິວັດ, ຄວາມຈົ່ງຮັກພັກດີ, ຄວາມເດັດດ່ຽວໜຽວແໜ້ນໃນແຕ່ລະບັ້ນຮົບເຊັ່ນວ່າ: ບັ້ນຮົບປົດປ່ອຍ ສາລາພູຄູນ, ກອງພັນທີ 2 ຜ່າວົງປິດລ້ອມ ທີ່ທົ່ງໄຫຫີນ, ປຸກລະດົມໃຫ້ຊາວໜຸ່ມເຍົາວະຊົນເຫັນໄດ້ຜົນຮ້າຍຂອງຢາເສບຕິດທີ່ມີຕໍ່ຊີວິດຮ່າງກາຍ ແລະ ຫ່າງໄກຈາກສິ່ງເສບຕິດຕ່າງໆເພື່ອເຮັດໃຫ້ສັງຄົມມີຄວາມສະຫງົບຫຼີກລຽງຈາກການເກີດມີການຂີ້ລັກງັກແງະ, ການອາລະວາດຕີກັນ ເພື່ອເປັນການປຸກລະດົມທຸກຊັ້ນຄົນໃນສັງຄົມເປັນເຈົ້າການໃນການປະຕິບັດວາລະແຫ່ງຊາດໃນການແກ້ໄຂບັນຫາຢາເສບຕິດ. ນອກນີ້ ຍັງເຮັດໃຫ້ປະຊາຊົນໄດ້ຮຽນຮູ້ບົດຮຽນໃນການປູກ-ການລ້ຽງເພື່ອສ້າງລາຍຮັບແກ່ຄອບຄົວ, ເຮັດໃຫ້ຄອບຄົວມີຢູ່ມີກິນ, ຫຼຸດພົ້ນຈາກການຖາງໄປ່ເຮັດໄຮ່ຊະຊາຍ ບ້ານມີການພັດທະນາຕາມແນວທາງຂອງພັກ ແລະ ສອດຄ່ອງກັບແຜນພັດທະນາເສດຖະກິດສັງຄົມຂອງລັດກໍ່ຄືມະຕິກອງປະຊຸມໃຫຍ່ຂອງແຂວງ ແລະ ຂອງເມືອງວາງອອກໃນແຕ່ລະໄລຍະ. ນອກຈາກການສາຍຟິມມູນເຊື້ອນັ້ນທິມງາມຍັງໄດ້ເຜີຍແຜ່ນິຕິກໍາຈໍານວນໜຶ່ງຂອງ ທ່ານ ເຈົ້າແຂວງໆຊຽງຂວາງເຊັ່ນ ຄໍາສັ່ງ ວ່າດ້ວຍການປ້ອງກັນການຖາງປ່າເຮັດໄຮ່ຊະຊາຍ ສະກັດກັ້ນໄຟໄໝ້ລາມປ່າ, ຄໍາສັ່ງ ວ່າດ້ວຍການຫ້າມຈັບຈອງ, ບຸກລຸກ ແລະ ຊື້-ຂາຍສິດນໍາໃຊ້ທີ່ດິນບໍ່ຖືກຕ້ອງຕື່ມອີກ.
ການນໍາເອົາກອງໂຄສະນາເຄື່ອນທີ່ລົງສາຍຟີມມູນເຊື້ອປະຫວັດສາດ ແລະ ສາລະຄະດີຕ່າງໆນັ້ນ; ມັນກໍ່ເປັນຮູບການໂຄສະນາສຶກສາອົບຮົມວຽກງານການເມືອງ-ແນວຄິດທີ່ສໍາຄັນອັນໜຶ່ງ ເຊິ່ງສາມາດເຮັດໃຫ້ຜູ້ຊົມໄດ້ສໍາພັດດ້ວຍຕາ, ເຂົ້າໃຈງ່າຍ, ເປັນການໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ, ປະຊາຊົນບັນດາເຜົ່າ, ຊາວໜຸ່ມ, ເຍົາວະຊົນໄດ້ຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມູນເຊື້ອປະຕິວັດໃນການຕໍ່ສູ້ກູ້ຊາດທີ່ບໍ່ຍອມຈໍານົນຂອງການນໍາຫຸ່ນກ່ອນ ແລະ ການຊີ້ນໍາ-ນໍາພາຂອງພັກເຮົາໃນໄລຍະໃໝ່ ເພື່ອພ້ອມກັນສ້າງສາພັດທະນາປະເທດຊາດໃຫ້ຫຼຸດພົ້ນອອກຈາກຄວາມດ້ອຍພັດທະນາ.
(ຂ່າວ: ນູຢ່າງ ຢົງມາ)