ເມື່ອບໍ່ດົນມານີ້ ຄະນະໂຄສະນາອົບຮົມແຂວງ ໄດ້ຈັດຕັ້ງພິທີໂຄສະນາ-ປາຖະກະຖາ ວັນສ້າງຕັ້ງແນວລາວສ້າງຊາດ ຄົບຮອບ 73 ປີ, ວັນຍຶດອຳນາດທົ່ວປະເທດ ສປປ ລາວ ຄົບຮອບ 78 ແລະ 48 ປີ ແລະ ວັນລັດຖະທຳມະນູນແຫ່ງ ສປປ ລາວ ຄົບຮອບ 32 ປີ ທີ່ຫ້ອງປະຊຸມຫ້ອງວ່າການແຂວງ. ໂດຍໃຫ້ກຽດເປັນປະທານກອງປະ ຊຸມຂອງສະຫາຍ ໜໍບີ ຫາຕົ່ງປາວ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດຂັ້ນແຂວງ ແລະ ໂດຍການເຂົ້າຮ່ວມຮັບຟັງຂອງ ຄະນະປະຈໍາພັກແຂວງ, ກຳມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງ, ພະນັກງານ-ລັດຖະກອນ, ລັດວິສາຫະກິດໃນອ້ອມຂ້າງແຂວງເຂົ້າຮ່ວມຟັງທັງໝົດ 200 ກ່ວາຄົນ, ຍິງ 70 ກ່ວາຄົນ.
ໃນພິທີ ສະຫາຍ ນາງ ພວງພະຈັນ ມູນທະວົງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ຜ່ານຄໍາແນະນໍາຂອງ ຄະນະປະຈໍາພັກແຂວງ ສະບັບເລກທີ 08/ຄປພຂ, ລົງວັນທີ 3 ສິງຫາ 2023. ວ່າດ້ວຍການຈັດຕັ້ງໂຄສະນາ-ປາຖະກະຖາ ວັນສ້າງຕັ້ງແນວລາວສ້າງຊາດ ຄົບຮອບ 73 ປີ, ວັນຍຶດອຳນາດທົ່ວປະເທດ ສປປ ລາວ ຄົບຮອບ 78 ແລະ 48 ປີ ແລະ ວັນລັດຖະທຳມະນູນແຫ່ງ ສປປ ລາວ ຄົບຮອບ 32 ປີ. ໃຫ້ກຽດຂຶ້ນປາຖະກະຖາ ວັນສ້າງຕັ້ງແນວລາວສ້າງຊາດ ໂດຍສະຫາຍ ນາງ ບົວສີ ນາຖະວົງ ຄະນະປະຈໍາພັກແຂວງ ຫົວໜ້າແນວລາວສ້າງຊາດແຂວງ ເຊິ່ງສະຫາຍໄດ້ເລົ່າຄືນມູນເຊື້ອການກຳເນີດ, ການເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດໃນແຕ່ລະໄລຍະແຫ່ງການຕໍ່ສູ້ກູ້ຊາດທີ່ບໍໍ່ຍອມຈໍານົນຂອງປະຊາຊົນລາວບັນດາເຜົ່າຕ້ານກັບຈັກກະພັດຝຣັ່ງ ແລະ ຈັກກະພັດອາເມລິກາ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວຈົນສາມາດຍາດໄດ້ໄຊຊະນະ ແລະ ຜົນງານໃນການຊີ້ນໍາ-ນໍາພາຂອງອົງການແນວລາວສ້າງຊາດໃນໄລຍະ 73 ປີທີ່ຜ່ານມາ ພ້ອມທັງເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພີ່ມທະວີວຽກງານແນວລາວສ້າງຊາດໃນຕໍ່ໜ້າໃຫ້ມີຄວາມເຂັ້ມແຂງ, ມີຄວາມສາມັກຄີບັນດາເຜົ່າໃຫ້ແໜ້ນແຟ້ນກວ່າເກົ່າ. ໃຫ້ກຽດຂຶ້ນປາຖະກະຖາ ວັນສື່ມວນຊົນ ແລະ ການພິມຈໍາໜ່າຍລາວ ໂດຍ ສະຫາຍ ຄອນສະໝຸດ ບຸນແພງພັນ ກຳມະການພັກແຂວງ ຫົວໜ້າພະແນກ ຖະແຫຼງຂ່າວ-ວັດທະນະທໍາ ແລະ ທ່ອງທ່ຽວແຂວງ ເຊິ່ງສະຫາຍ ໄດ້ຫວນຄືນປະຫວັດ, ມູນເຊື້ອສື່ມວນຊົນ ແລະ ການພິມຈໍາໜ່າຍໃນໄລຍະ 73 ປີທີ່ຜ່ານມາ ເພາະວ່າວຽກງານສື່ມວນຊົນມັນໄດ້ຕິດພັນກັບການຕໍ່ສູ້ກູ້ຊາດໃນການເປັນກະບອກສຽງເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າໃນໄລຍະຕໍ່ສູ້ປົດປ່ອຍຊາດຍາດເອົາເອກະລາດແຫ່ງຊາດ ແລະ ອິດສະຫຼະພາບມາສູ່ປະຊາຊົນກໍ່ຄືໄລຍະແຫ່ງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ບັນດາຜົນງານທີ່ພົ້ນເດັ່ນໃນໄລຍະ 73 ປີ ຂອງວຽກງານສື່ມວນຊົນ ແລະ ພິມຈໍາໜ່າຍ.ຈາກນັ້ນສະຫາຍ ໜໍບີ ຫາຕົ່ງປາວ ໄດ້ໃຫ້ກຽດຂຶ້ນປາຖະກະຖາ ວັນຢຶດອໍານາດທົ່ວປະເທດ ສປປ ລາວ ແລະ ວັນລັດຖະທຳມະນູນ ແຫ່ງ ສປປ ລາວ ໂດຍແມ່ນ ເຊິ່ງສະຫາຍ ໄດ້ຫວນຄືນປະຫວັດຄວາມເປັນມາຂອງການຢຶດອໍານາດທົ່ວປະເທດໃນວັນທີ 23 ສິງຫາ 1945 ຈາກພວກລ່າເມືອງຂຶ້ນແບບເກົ່າ ແລະ ການຢຶດອໍານາດ ໃນວັນທີ 23 ສິງຫາ 1975 ຈາກພວກລ່າເມືອງຂຶ້ນແບບໃໝ່ ໃນການຕໍ່ສູ້ບໍ່ຍອມຈໍານົນ, ຄວາມສາມັກຄີຂອງປະຊາຊົນລາວບັນດາເຜົ່າ ພາຍໃຕ້ການຊີ້ນໍາ-ນໍາພາຂອງພັກປະຊາຊົນ ປະຕິວັດລາວ ທີ່ໄດ້ວາງແນວທາງອັນຖືກຕ້ອງໂດຍນໍາໃຊ້ 3 ບາດຄ້ອນຍຸດທະສາດຄື: ການລຸກຮື້ຂຶ້ນຂອງມະຫາຊົນ, ການໜູນໜີບຂອງກຳລັງປະກອບອາວຸດ, ການແຍກຕົວອອກຂອງກຳລັງທະຫານຂອງສັດຕູ ເພື່ອມາຢຶດອຳນາດການປົກຄອງໃນທົ່ວປະເທດແບບ “ ບົວບໍ່ຊໍ້າ ນໍ້າບໍ່ຂຸ່ນ ”, ເສີມຂະຫຍາຍມູນເຊື້ອ 23 ສິງຫາ ເຂົ້າໃນການພັດທະນາປະເທດຊາດ. ນອກຈາກນີ້ ກໍ່ຍັງໄດ້ຜ່ານການກຳເນີດ ແລະ ຄວາມໝາຍສໍາຄັນຂອງລັດຖະທຳມະນູນ ເປັນຕົ້ນແມ່ນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ, ຜົນງານດ້ານດີ, ດ້ານອ່ອນຄົງຄ້າງ, ບົດຮຽນທີ່ຖອດຖອນໄດ້ ແລະ ເພີ່ມທະວີການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃຫ້ເຂັ້ມງວດ.
ໃນຕອນທ້າຍພິທີ ປະທານກອງປະຊຸມ ຍັງໄດ້ຊີ້ນໍາເພີ່ມເຕີມເປັນຕົ້ນ: ເພື່ອເຮັດໃຫ້ພິທີປາຖະກະຖາ ມີຄວາມໝາຍຄວາມສຳຄັນ, ມີເນື້ອໃນເລິກເຊິ່ງ ແລະ ໄດ້ຮັບການເຜີຍແຜ່ຢ່າງກ້ວາຂວາງນັ້ນ ແມ່ນມອບໃຫ້ຄະນະພັກແຕ່ລະພະແນກການ, ກົມກອງອ້ອມຂ້າງແຂວງ ຈົ່ງນໍາເອົາເນື້ອໃນດັ່ງກ່າວເພື່ອໄປຈັດຕັ້ງເຜີຍແຜ່ໃຫ້ແກ່ພະນັກ ງານ-ລັດຖະກອນຢູ່ໃນກົມກອງຂອງຕົນເພື່ອໃຫ້ຮັບຮູ້ເຂົ້າໃຈ, ເນື້ອໃນ, ຄວາມໝາຍຄວາມສຳຄັນ, ເສີມຂະຫຍາຍມູນເຊື້ອວັນສໍາຄັນດັ່ງກ່າວໃຫ້ເປັນຂະບວນຟົດຟື້ນ ແລະ ກວ້າງຂວາງ.
ຂ່າວ: ທ້າວ ນູຢ່າງ ຢົງມາ