ຝຶກອົບຮົມມະຫາຊົນເພື່ອຂະຫຍາຍເຂົ້າພັກ ຊຸດທີ່ I ປີ 2026
ວັນທີ 11 ມິຖຸນາ 2026 ຄະນະໂຄສະນາອົບຮົມແຂວງ ໄດ້ເປີດພິທີຝຶກອົບຮົມມະຫາຊົນຜູ້ກ້າວໜ້າເປົ້າ ໝາຍທີ່ຈະຫຍາຍເຂົ້າເປັນສະມາຊິກພັກ ປະຊາຊົນປະຕິວັດລາວ, ເຊິ່ງໄດ້ຈັດຝຶກອົບຮົມຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ ໂດຍການເປັນປະທານຂອງ ສະຫາຍ ກິ່ງແກ້ວ ແສງມະນີວົງ ຮອງເລຂາໜ່ວຍພັກ ຮອງຫົວໜ້າຄະນະໂຄສະນາອົບຮົມແຂວງ, ມີພະນັກງານລັດຖະກອນທີ່ເປັນມະຫາຊົນຜູ້ກ້າວໜ້າມາຈາກ 5 ຄະນະພັກຮາກຖານ ແລະ 1 ໜ່ວຍພັັກອ້ອມຂ້າງແຂວງຈໍານວນ 38 ສະຫາຍ ຍິງ 21 ສະຫາຍ.
ໃນພິທີດັ່ງກ່າວ ຕາງໜ້າ ຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍການອະນຸມັດ ເປີດຮຽນສະໜັບສະໜູນມະຫາຊົນຜູ້ກ້າວໜ້າເປົ້າໝາຍທີ່ຈະຂະຫຍາຍເຂົ້າພັກ, ມະຕິແຕ່ງຕັ້ງຄະນະຮັບຜິດຊອບຝຶກອົບຮົມ ແລະ ແຜນການຝຶກອົບຮົມ. ການຝຶກອົບຮົມຄັ້ງນີ້ແມ່ນມີຄວາມໝາຍ ຄວາມສໍາຄັນນັກສໍາມະນາກອນໄດ້ຮັບຮູ້-ເຂົ້າໃຈຄວາມໝາຍຄວາມສໍາຄັນ, ຄວາມເປັນມາ, ອຸດົມຄະຕິ ແລະ ທາດແທ້ຂອງພັກປະຊາຊົນປະຕິວັດລາວບົນພື້ນຖານທີ່ຈະຕ້ອງຝຶກຝົນຕົນເອງ ແລະ ຄວາມຕື່ນຕົວສະໝັກເຂົ້າເປັນສະມາຊິກພັກ. ຜູ້ທີ່ຈະຂະຫຍາຍເຂົ້າເປັນສະມາຊິກພັກຕ້ອງແມ່ນບຸກຄົນທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດສູງ, ມີແບບແຜນວິທີເຮັດວຽກ, ແບບແຜນດໍາລົງຊີວິດທີ່ໂປ່ງໃສຂາວສະອາດ, ເປັນແບບຢ່າງນໍາໜ້າໃຫ້ແກ່ມະຫາຊົນຜູ້ອື່ນໆ, ມີຄວາມເປັນເອກະພາບສູງກັບມະຕິ, ແນວທາງນະໂຍບາຍຂອງພັກ, ຕັ້ງໜ້າຝຶກຝົນຕົນເອງໃຫ້ມີຄວາມຮູ້ ຄວາມສາມາດມີພອນສະຫວັນ, ເຄົາລົບນັບຖືຮີດຄອງປະເພນີອັນດີງາມຂອງຊາດ, ປະຕິບັດຖຶກຕ້ອງຕາມກົດລະບຽບຂອງພັກ ແລະ ກົດ ໝາຍຂອງລັດ. ການຝຶກອົບຮົມໃນຄັ້ງນີ້ໄດ້ມີບັນຍາກາດຟົດຟື້ນດີ, ໂດຍສະເພາະແມ່ນມີການແລກປ່ຽນບົດຮຽນລະ ຫວ່າງນັກສໍາມະນາກອນ ແລະ ຜູ້ບັນຍາຍແລກປ່ຽນບົດຮຽນເຊິ່ງກັນ ແລະ ກັນ, ເຮັດໃຫ້ສາມາດເຂົ້າໃຈແຈ້ງຕໍ່ແຕ່ລະບັນຫາໃນ 13 ຄໍາຖາມ, 13 ຄໍາຕອບກ່ຽວກັບພັກປະຊາຊົນປະຕິວັດລາວ.
ຕອນທ້າຍ ສະຫາຍ ກິ່ງແກ້ວ ແສງມະນີວົງ ໃຫ້ກຽດມອບໃບຢັ້ງຢືນ, ໂອ້ລົມ, ກ່ວປິດຊຸດຝຶກອົບຮົມ, ສະຫາຍໄດ້ໃຫ້ທິດຊີ້ນໍາການຝຶກອົບຮົມໃນຄັ້ງນີ້ ແມ່ນມີຄວາມໝາຍຄວາມສໍາຄັນຫຼາຍເພາະເປັນເອກະສານເບື້ອງຕົ້ນ ໃນການສ້າງຄວາມຮັບຮູ້ເຂົ້າໃຈຕໍ່ອົງການນໍາພາສູງສຸດກໍຄືພັກປະຊາຊົນປະຕິວັດລາວ ຍາມໃດກໍຢຶດໝັ້ນລັດທິມາກ-ເລນິນ, ຖືເອົາແນວຄິດ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນເຂັ້ມທິດເຍື້ອງທາງໃນການຈັດຕັ້ງຜັນຂະຫຍາຍແນວທາງແຜນນະໂຍບາຍ ຂອງພັກກໍຄືແຜນພັດທະນາເສດຖະກິດ-ສັງຄົມແຫ່ງຊາດ ທີ່ວາງອອກໃນແຕ່ລະສະໄໝ ແລະ ໄດ້ເນັ້ນໜັກຕື່ມໃຫ້ມະຫາຊົນຜູ້ກ້າວໜ້າແຕ່ລະສະຫາຍຈົ່ງສືບຕໍ່ຕັ້ງໜ້າບຸກບືນ, ສ້າງຕົນເອງໃຫ້ກາຍເປັນສະມາ ຊິກພັກຜູ້ຫ້າວຫັນ, ດີເດັ່ນເພື່ອປະກອບສ່ວນພັດທະນາການຈັດຕັ້ງຂອງພັັກໃຫ້ເຂັ້ມແຂງຂື້ນເລື້ອຍໆ.
ຂຽນໂດຍ: ນາງ ບົວສີ ພັນທະສອນ