ກອງປະຊຸມວຽກງານໂຄສະນາຜ່ານສື່ເອເລັກໂຕຣນິກ
ປະຈໍາໄຕມາດ I ປະຈໍາປີ 2025 ຂອງຄະນະໂຄສະນາອົບຮົມແຂວງ ໃນທົ່ວປະເທດ
ໃນຕອນເຊົ້າ ຂອງວັນທີ 2 ເມສາ 2025 ຄະນະໂຄສະນາອົບຮົມແຂວງຊຽງຂວາງ ໄດ້ເຂົ້າຮ່ວມປະຊຸມສ່ອງແສງລາຍງານການເຄື່ອນໄຫວວຽກງານໂຄສະນາຜ່ານສື່ເອເລັກໂຕຣນິກ ປະຈໍາໄຕມາດ I/2025 ແລະ ທິດທາງແຜນການໃນຕໍ່ໜ້າ, ໂດຍຜ່ານລະບົບ (Video Conference) ທີ່ຄະນະໂຄສະນາອົບຮົມສູນກາງພັກຈັດຂຶ້ນ, ໂດຍໃຫ້ກຽດເປັນປະທານຂອງ ທ່ານ ວັນຕຸລາ ຮັກນຸດ ກໍາມະການຄະນະພັກ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ຄະນະໂຄສະນາອົບຮົມແຂວງຊຽງຂວາງມີແອັດມິນ ແລະ ວິຊາການຂະແໜງສັງລວມຂໍ້ມູນຂ່າວສານເຂົ້າຮ່ວມຈໍານວນ 3 ທ່ານ, ຍິງ 2 ທ່ານ.
ໃນກອງປະຊຸມ ທ່ານ ວັນຕຸລາ ຮັກນຸດ ໄດ້ກ່າວເປີດພິທີ ແລະ ກ່າວຈຸດປະສົງຂອງກອງປະຊຸມ ຈາກນັ້ນ, ຍັງໄດ້ຮັບຟັງການລາຍງານການຈັດຕັ້ງປະຕິບັດວຽກງານໂຄສະນາຜ່ານສື່ເອເລັກໂຕຣນິກ ໂດຍຫຍໍ້ ຈາກບັນດາຄະນະໂຄສະນາອົບຮົມ 17 ແຂວງ 1 ນະຄອນຫຼວງ. ເຊິ່ງແຕ່ລະແຂວງໄດ້ຍົກໃຫ້ເຫັນເຖິງຜົນສໍາເລັດດ້ານທີ່ຕັ້ງໜ້າ, ຂໍ້ສະດວກ ແລະ ຂໍ້ຫຍຸ້ງຍາກ, ພ້ອມທັງຂໍ້ສະເໜີຕ່າງໆ ເພື່ອຈະໄດ້ນຳໄປສືບຕໍ່ແກ້ໄຂໃນຕໍ່ໜ້າ, ພ້ອມທັງກໍານົດທິດທາງແຜນການໄຕມາດ II/2025, ເພື່ອເຮັດໃຫ້ວຽກງານຂໍ້ມູນຂ່າວສານ ຂອງຄະນະໂຄສະນາອົບຮົມແຂວງ ກາຍເປັນສື່ທີ່ທັນສະໄຫມເຂົ້າໃນການເຜີຍແຜ່ຂໍ້ມູນ, ບັນດາມະຕິ, ຄໍາສັ່ງ ແລະ ແນວທາງຂອງພັກ-ລັດ ໃນການສະໜອງຂໍ້ມູນໃຫ້ແກ່ຄະນະພັກ, ຄະນະນໍາໄດ້ຢ່າງກວ້າງຂວາງ ແລະ ມີຄວາມສະດວກວ່ອງໄວຂຶ້ນກວ່າເກົ່າ, ເພື່ອປັບປຸງວຽກງານຜ່ານສື່ເອເລັກໂຕຣນິກກ້າວສູ່ຄຸນນະພາບໃໝ່.
ໃນຕອນທ້າຍ ທ່ານປະທານກອງປະຊຸມໄດ້ມີຄໍາເຫັນຊີ້ນໍາໃຫ້ແອັດມິນຂອງບັນດາແຂວງ ສືບຕໍ່ຕິດຕາມກວດກາເວັບໄຊຂອງຕົນ, ເກັບກໍາຂ່າວ, ຂຽນຂ່າວ, ຈັດຂ່າວລົງບັນດາຄໍລໍາຕ່າງໆໃຫ້ມີເນື້ອໃນອຸດົມສົມບູນ, ມີການເຜີຍແຜ່ຂໍ້ມູນຂ່າວສານຂອງຄະນະໂຄສະນາອົບຮົມແຂວງ ເປັນຕົ້ນແມ່ນພາລະບົດບາດ, ກົງຈັກການຈັດຕັ້ງ, ຂ່າວສານ, ເອກະສານຕ່າງໆ ຜູ້ຂຽນຂ່າວຕ້ອງເພີ່ມທະວີຄວາມເອົາໃຈໃສ່ ໃນການຕິດຕາມກວດກາການຂຽນຂ່າວ, ລົງຂ່າວໃຫ້ໄດ້ທັງປະລິມານ ແລະ ຄຸນນະພາບ ເພື່ອເຮັດໃຫ້ວຽກງານມີຜົນສໍາເລັດສູງ.
ໂດຍ: ສີຍອງ ພອນທະຈັນ