ແຂວງຊຽງຂວາງ ເປີດປີທ່ອງທ່ຽວ ແລະ ງານບຸນເທດສະການບຸນເຂົ້າໄກ່ນ້ອຍ
ໃນຕອນແລງຂອງວັນທີ 5 ທັນວາ 2024 ແຂວງຊຽງຂວາງ ໄດ້ເປີດປີທ່ອງທ່ຽວລາວ 2024 ແລະ ງານບຸນເທດສະການບຸນເຂົ້າໄກ່ນ້ອຍ ຂຶ້ນຢ່າງເປັນທາງການ ຢູ່ທີ່ເດີ່ນສວນວັດທະນະທໍາແຂວງ, ໂດຍການເປັນປະທານຂອງທ່ານ ບຸນຈັນ ສີວົງພັນ ກໍາມະການສູນກາງພັກ, ເລຂາພັກແຂວງ ເຈົ້າແຂວງຊຽງຂວາງ, ເຂົ້າຮ່ວມໃນພິທີມີ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ພ້ອມດ້ວຍຄະນະ, ມີຕາງໜ້າການນໍາຂັ້ນສູນກາງ, ການນໍາຂອງແຂວງຊຽງຂວາງ ແລະ ບັນດາພະແນກການ, ກົມກອງ, ລັດວິສາຫະກິດພັກ-ລັດ ແລະ ເອກະຊົນ, ບໍລິສັດຫ້າງຮ້ານ, ນັກທຸລະກິດຕະຫຼອດຮອດມວນຊົນຊາວແຂວງຊຽງຂວາງເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ, ຜູ້ຊີ້ນໍາວຽກງານວັດທະນະທໍາ-ສັງຄົມແຂວງ ໄດ້ຂຶ້ນລາຍງານການກະກຽມຄວາມພ້ອມ ແລະ ກ່າວຈຸດປະສົງຂອງການຈັດງານໃນຄັ້ງນີ້ ແມ່ນໄດ້ມີຫຼາຍກິດຈະກໍາເຊັ່ນ: ກອງເຂົ້າຈໍາລອງຈໍານວນ 3 ກອງ, ຮູບພາບມໍລະດົກໄຫຫີນ 11 ແຫຼ່ງ, ພິທີສູ່ຂວັນເຂົ້າ, ກິດຈະ
ກໍາແຂ່ງຂັນປຸ່ງແຕ່ງອາຫານ, ງານວາງສະແດງຜະລິດຕະພັນດ້ານກະສິກໍາ, ເຂົ້າໄກ່ນ້ອຍ, ງານວາງສະແດງສິນຄ້າໂອດອບ, ຕະຫຼາດນັດສິນຄ້າທົ່ວໄປ, ງານສະແດງສີລະປະວັນນະຄະດີ, ຕີກອງຄູ່, ຈັດພິທີສົນທະນາລະຫວ່າງຜູ້ປະກອບການ ແລະ ເດີນແບບຊຸດຊົນເຜົ່າຂອງແຂວງຊຽງຂວາງ, ຈາກນັ້ນ, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ໄດ້ມີຄໍາເຫັນເປີດພິທີຢ່າງເປັນທາງການ ເຊິ່ງທ່ານໄດ້ກ່າວເຖິງຄວາມໝາຍຄວາມສໍາຄັນຂອງວຽກງານການທ່ອງທ່ຽວ ແລະ ປະຫວັດຄວາມ
ເປັນມາຂອງງານບຸນເຂົ້າໄກ່ນ້ອຍ ເປັນຕົ້ນແມ່ນວິຖີຊີວິດທີ່ເປັນເອກະລັກສະເພາະຂອງແຂວງຊຽງຂວາງ ທັງເປັນໂຄສະນາໃຫ້ນັກທ່ອງທ່ຽວເຂົ້າມາທ່ຽວຊົມ ແລະ ສຶກສາຮຽນຮູ້ປະຫວັດຄວາມເປັນມາຂອງແຂວງຊຽງຂວາງ, ຊາວຊຽງຂວາງພ້ອມແລ້ວທີ່ຈະຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເຂົ້າມາທ່ຽວຊົມຄວາມອຸດົມສົມບູນຂອງຊັບພະຍາກອນທໍາມະຊາດ ທີ່ສວຍສົດງົດງາມ, ອາກາດເຢັນສົດຊື່ນ ແລະ ທ່ຽວຊົມໄຫຫີນມໍລະດົກໂລກ, ຮຽນຮູ້ວັດທະນະທໍາ, ຮີດຄອງປະ ເພນີ, ວິຖີຊີວິດຂອງບັນດາເຜົ່າຢູ່ພາຍໃນແຂວງຊຽງຂວາງ ຈາກນັ້ນ, ກໍ່ໄດ້ມີພິທີຕັດແຖບຜ້າ ແລະ ລັ່ນຄ້ອງ 9 ບາດ, ເພື່ອເປີດງານຢ່າງເປັນທາງການ.
ການຈັດງານບຸນເຂົ້າໄກ່ນ້ອຍປະຈໍາປີຢູ່ແຂວງຊຽງຂວາງ ໃນຄັ້ງນີ້ເປັນກິດຈະກໍາໜຶ່ງທີ່ເປັນການໂຄສະນາການທ່ອງທ່ຽວອອກສູ່ສັງຄົມໃຫ້ນັບມື້ຫຼາຍຂຶ້ນ ແລະ ສ້າງຄວາມສົນໃຈໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມໃຫ້ນັບມື້ເພີ່ມຂຶ້ນ, ເປັນການກະຕຸ້ນເສດຖະກິດຂອງແຂວງ ທັງເປັນການກະ ຈາຍລາຍໄດ້ໃຫ້ຜູ້ປະກອບການດໍາເນີນທຸລະກິດ, ເຮືອນພັກ, ໂຮງແຮມ, ຮ້ານອາຫານ, ຮ້ານບັນເທິງ, ລວມທັງການຜະລິດສິນຄ້າ, ການບໍລິການນໍາທ່ຽວເປັນການສ້າງວຽກເຮັດງານທໍາ ແລະ ສ້າງລາຍຮັບໃຫ້ແກ່ປະຊາຊົນ, ຜູ້ປະກອບການຜະລິດ ແລະ ການບໍລິການດ້ານຕ່າງໆຢູ່ພາຍໃນແຂວງຊຽງຂວາງ, ເປັນການຊຸກຍູ້ສົ່ງ ເສີມການອານຸລັກສົ່ງເສີມວັດທະນະທໍາ, ຮີດຄອງປະເພນີອັນດີງາມຂອງຊາວຊຽງຂວາງ, ປົກປັກຮັກສາທໍາມະຊາດໃຫ້ມີຄວາມຢືນຍົງ ແລະ ເປັນການເປີດປີທ່ອງ ທ່ຽວ 2024 ແລະ ງານບຸນປະເພນີຂອງແຕ່ລະເຜົ່າຂອງແຂວງຊຽງຂວາງ, ດ້ວຍບັນຍາກາດຄຶກຄື້ນມ່ວນຊື່ນ ແລະ ມີຜູ້ເຂົ້າຮ່ວມຢ່າງຫຼວງຫຼາຍ.
ໂດຍ: ສີຍອງ ພອນທະຈັນ