ຄະນະໂຄສະນາອົບຮົມສູນກາງພັກ
ຈັດກອງປະຊຸມຮັບສ່ອງແສງລາຍງານສະພາບແນວຄິດ-ຫາງສຽງສັງຄົມ ຢູ່ແຂວງຊຽງຂວາງ.
ວັນທີ 9 ທັນວາ 2024 ຢູ່ທີ່ຫ້ອງປະຊຸມໃຫຍ່ຫ້ອງວ່າການແຂວງຊຽງຂວາງ ທ່ານ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ, ໄດ້ລົງເຄື່ອນໄຫວເຮັດວຽກ ຢູ່ແຂວງຊຽງຂວາງ ໂດຍໄດ້ພົບປະໂອ້ລົມກັບຄະນະພັກ, ພະນັກງານການນໍາຂອງແຂວງຊຽງຂວາງ ໂດຍການເປັນປະທານຮ່ວມຂອງທ່ານ ໜໍບີ ຫາຕົ່ງປາວ ຮອງເລຂາຄະນະບໍລິຫານງານພັກແຂວງ, ຜູ້ຊີ້ນໍາວຽກງານການເມືອງແນວຄິດຂັ້ນແຂວງ, ມີທ່ານນາງ ພວງພະຈັນ ມູນທະວົງ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ຄະນະກໍາມະການເກັບກໍາຫາງສຽງສັງຄົມຂັ້ນແຂວງ ພ້ອມດ້ວຍພະນັກ ງານຄະນະໂຄສະນາອົບຮົມແຂວງ ແລະ ຫົວໜ້າຄະນະໂຄສະນາອົບຮົມເມືອງເຂົ້າຮ່ວມ ທັງໝົດ 50 ທ່ານ; ຍິງ 18 ທ່ານ.
ໃນພິທີ ທ່ານ ຈັນທະບູນ ແພງສົມພູ ຮອງຫົວໜ້າຄະນະໂຄສະນາອົບຮົມແຂວງ ໄດ້ຂຶ້ນລາຍງານຫຍໍ້ກ່ຽວກັບແຜນພັດທະນາເສດຖະກິດ-ສັງຄົມຂອງແຂວງ ແລະ ການກະກຽມກອງປະຊຸມໃຫຍ່ 3 ຂັ້ນຂອງພັກ, ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ລາຍງານສະພາບແນວຄິດຫາງສຽງສັງ ຄົມທີ່ເກີດຂຶ້ນຢູ່ແຂວງຊຽງຂວາງ ປະຈໍາປີ 2024 ຜ່ານມາ ແລະ ທິດທາງແຜນການໃນການເຄື່ອນໄຫວວຽກງານໂຄສະນາອົບຮົມ ແລະ ການເກັບກໍາສະພາບແນວຄິດຫາງສຽງສັງຄົມໃນປີ 2025 ຈາກນັ້ນ, ບັນດາຄະນະກໍາມະການເກັບກໍາຫາງສຽງສັງຄົມແຕ່ລະຂົງເຂດ ໄດ້ຜັດປ່ຽນກັນຂຶ້ນປະກອບຄໍາເຫັນຕໍ່ກອງປະຊຸມ ເພື່ອ
ແລກປ່ຽນຄວາມຄິດເຫັນ ແລະ ຖອດຖອນບົດຮຽນ ພ້ອມທັງສະເໜີວິທີການແກ້ໄຂໃຫ້ທັນເວລາ ເຊິ່ງໃນໄລຍະຜ່ານມາຄະນະໂຄສະນາອົບຮົມແຂວງ ແລະ ເມືອງ, ຄະນະພັກແຕ່ລະຂັ້ນ, ຄະນະເກັບກໍາຫາງສຽງສັງຄົມໄດ້ພ້ອມກັນຄົ້ນຄ້ວາ, ວິເຄາະວິໄຈຫາສາເຫດຂອງຫາງສຽງສັງຄົມທີ່ເກີດຂຶ້ນ ແລະ ໄດ້ຖືເອົາວຽກງານຕິດຕາມເກັບກໍາຫາງສຽງສັງຄົມເປັນວຽກງານທີ່ສໍາຄັນຂອງພັກ, ປະຕິບັດຕາມພາລະບົດບາດສິດ ແລະ ໜ້າທີ່ ເປັນເສນາທິການໃຫ້ແກ່ຄະນະພັກແຂວງ, ຄະນະໂຄສະນາອົບຮົມສູນກາງພັກ, ໃນການຕິດຕາມກວດກາ ແລະ ເກັບກໍາສະພາບແນວຄິດຫາງສຽງສັງຄົມດ້ານທີ່ຕັ້ງໜ້າ ແລະ ດ້ານຫຍໍ້ທໍ້, ຖ້ອຍທໍານອງບິດເບືອນ, ການໂຄສະນາໃສ່ຮ້າຍປ້າຍສີຕໍ່ການນໍາພາຂອງພັກ-ລັດ.
ຕອນທ້າຍຂອງກອງປະຊຸມ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມແຂວງ ໄດ້ເໜັ້ນໜັກໃຫ້ຄະນະຮັບ ຜິດຊອບສືບຕໍ່ຕິດຕາມ, ເກັບກໍາສະພາບແນວຄິດຫາງສຽງສັງຄົມຂັ້ນແຂວງ, ເມືອງ ໃຫ້ສືບຕໍ່ເກັບກໍາ, ສະຫຼຸບສັງລວມ ແລະ ລາຍງານເຖິງຄະນະໂຄສະນາອົບຮົມເມືອງ ແລະ ແຂວງໃຫ້ເປັນປົກກະຕິ ເພື່ອໃຫ້ຄະນະໂຄສະນາອົບຮົມແຂວງ ໄດ້ສະຫຼຸບສັງລວມລາຍງານເຖິງຄະນະໂຄສະນາອົບຮົມສູນກາງພັກ, ນອກນັ້ນ, ທ່ານຍັງໄດ້ເໜັ້ນໃຫ້ຄະນະພັກທຸກຂັ້ນຕ້ອງເອົາໃຈໃສ່ເຮັດວຽກງານໂຄສະນາສຶກສາອົບຮົມການເມືອງ-ແນວຄິດ ໃຫ້ບັນດາກຸ່ມເປົ້າໝາຍ ເພື່ອຕອບໂຕ້ການໂຄສະນາໃສ່ຮ້າຍປ້າຍສີຂອງກຸ່ມຄົນທີ່ບໍ່ຫວັງດີ ແລະ ສືບຕໍ່ແກ້ໄຂບັນຫາຫາງສຽງສັງຄົມທີ່ເກີດຂຶ້ນໃນໄລຍະຜ່ານມາໃຫ້ທັນເວລາ, ສໍາລັບການເຄື່ອນໄຫວວຽກງານວິຊາສະເພາະຂອງຄະນະໂຄສະນາອົບຮົມແຂວງ ແລະ ເມືອງແມ່ນໃຫ້ຍົກສູງພາລະບົດບາດເປັນເສນາທິການໃຫ້ແກ່ຄະນະພັກຂັ້ນຂອງຕົນ ຕົ້ນຕໍແມ່ນການກຽມເນື້ອໃນ, ວາ ລະ, ສະຖານທີ່ ເພື່ອຈັດຕັ້ງປາຖະກະຖາວັນສໍາຄັນຕ່າງໆ ຂອງພັກ, ຂອງຊາດ ເປັນເຈົ້າການໃນການກະກຽມເນື້ອໃນການຝຶກອົບຮົມໃຫ້ບັນດາເປົ້າໝາຍຕ່າງໆ ຕາມເອກະສານທີ່ຄະນະໂຄສະນາອົບຮົມສູນກາງພັກສະໜອງໃຫ້ໃນແຕ່ລະໄລຍະ ເພື່ອຍົກສູງຄວາມເປັນເອກະພາບຂອງສັງຄົມ ໃນການຈັດຕັ້ງປະຕິບັດຕາມແນວທາງນະໂຍບາຍຂອງພັກ.
ໂດຍ: ສີຍອງ ພອນທະຈັນ