ກອງປະຊຸມສ່ອງແສງລາຍງານວຽກງານໂຄສະນາຜ່ານສື່ເອເລັກໂຕຣນິກ
(ເວັບໄຊ) ປະຈໍາໄຕມາດ II ປະຈໍາປີ 2024 ຂອງຄະນະໂຄສະນາອົບຮົມແຂວງ ໃນທົ່ວປະເທດ
ໃນຕອນເຊົ້າ ຂອງວັນທີ 27 ມິຖຸນາ 2024 ຄະນະໂຄສະນາອົບຮົມແຂວງຊຽງຂວາງ ໄດ້ເຂົ້າຮ່ວມປະຊຸມສ່ອງແສງລາຍງານການເຄື່ອນໄຫວວຽກງານໂຄສະນາຜ່ານສື່ເອເລັກໂຕຣນິກ ປະຈໍາໄຕມາດ II ແລະ ທິດທາງແຜນການປະຈໍາໄຕມາດ III /2024, ໂດຍຜ່ານລະບົບ (Video Conference) ທີ່ຄະນະໂຄສະນາອົບຮົມສູນກາງພັກຈັດຂຶ້ນ, ໂດຍໃຫ້ກຽດເປັນປະທານຂອງ ທ່ານ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າຄະນະໂຄສະນາອົບຮົມສູນກາງພັກ, ທ່ານ ວັນຕຸລາ ຮັກນຸດ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ແຂວງຊຽງຂວາງ ໄດ້ເຂົ້າຮ່ວມຈໍານວນ 5 ທ່ານ, ຍິງ 1 ທ່ານ, ນໍາພາໂດຍ ທ່ານ ວັນນະສິນ ຜະລີຈັນ ຄະນະພັກຮອງຫົວໜ້າຄະນະໂຄສະນາອົບຮົມແຂວງ.
ໃນກອງປະຊຸມ ໄດ້ຮັບຟັງການລາຍງານການຈັດຕັ້ງປະຕິບັດວຽກງານໂຄສະນາຜ່ານສື່ເອເລັກໂຕຣນິກ ໂດຍຫຍໍ້ ຈາກບັນດາຄະນະໂຄສະນາອົບຮົມ 16 ແຂວງ 1 ນະຄອນຫຼວງ. ເຊິ່ງຍົກໃຫ້ເຫັນເຖິງຜົນສໍາເລັດດ້ານທີ່ຕັ້ງໜ້າ, ຂໍ້ຫຍຸ້ງຍາກທີ່ຈະໄດ້ແກ້ໄຂໃນຕໍ່ໜ້າ, ພ້ອມທັງກໍານົດທິດທາງແຜນການໄຕມາດ III/2024, ເພື່ອເຮັດໃຫ້ວຽກງານຂໍ້ມູນຂ່າວສານ ຂອງຄະນະໂຄສະນາອົບຮົມແຂວງ ກາຍເປັນສື່ທີ່ທັນສະໄໝ ໃນການສະໜອງຂໍ້ມູນ ໃຫ້ແກ່ຄະນະພັກ, ຄະນະນໍາໄດ້ຢ່າງກວ້າຂວາງ ແລະ ມີຄວາມສະດວກວ່ອງໄວຂຶ້ນກວ່າເກົ່າ, ເພື່ອປັບປຸງວຽກງານຜ່ານສື່ເອເລັກໂຕຣນິກຫັນສູ່ຄຸນນະພາບໃໝ່, ເພື່ອຕອບສະໜອງຕາມຄວາມຮຽກ ຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່; ໃນຕອນທ້າຍຂອງກອງປະຊຸມ ທ່ານປະທານໄດ້ມີຄໍາເຫັນໂອ້ລົມພ້ອມທັງມີທິດຊີ້ນໍາບາງບັນຫາດັ່ງນີ້:
- ໃຫ້ຜູ້ຊີ້ນໍາແອັດມິນ ຜູ້ຮັບຜິດຊອບເວບໄຊ ແລະ ຜູ້ຂຽນຂ່າວເພີ່ມທະວີຄວາມເອົາໃຈໃສ່ ໃນການຕິດຕາມກວດກາການຂຽນຂ່າວ, ລົງຂ່າວຜ່ານສື່ໃຫ້ມີຄວາມຫຼາກຫຼາຍ ແລະ ອຸດົມສົມບູນຂຶ້ນຕື່ມ.
- ໃຫ້ບັນດາສະຫາຍສົມທົບກັນເບິ່ງຄືນ ຍັງມີຂອດໃດພົບຄວາມຫຍຸ້ງຍາກດ້ານອຸປະກອນຮັບໃຊ້ພຽງພໍບໍ່, ການຊີ້ນໍາຂອງຄະນະນໍາໃຫ້ມີຄວາມສໍາຄັນຕໍ່ວຽກງານນີ້ຢ່າງເລິກເຊິ່ງແລ້ວບໍ່ ຫຼື ແອັດມິນເຮັດໜ້າທີ່ເປັນເຈົ້າການລາຍງານໃຫ້ຄະນະຮັບຊາບທັນສະພາບການບໍ່ ເພື່ອກໍາໄດ້ບັນຫາໃນການສະເໜີຂໍທິດຊີ້ນໍາຈາກຂັ້ນເທິງປັບປຸງແກ້ໄຂຕາມຂັ້ນ ເພື່ອແກ້ໄຂໃຫ້ທັນເວລາ.
- ໃຫ້ມີການຖອດຖອນບົດຮຽນນໍາກັນລະຫວ່າງແຂວງອ້ອມຂ້າງ ພາກໃຕ້, ພາກເໜືອ ແລກປ່ຽນກັບສູນກາງກໍໄດ້ ແຕ່ບົດຮຽນທີ່ສອດຄ່ອງກັນແທ້ໆ ກໍ່ແມ່ນການແລກປ່ຽນລະຫວ່າງແຂວງກັບແຂວງ.
- ໃຫ້ຄະນະນໍາຂອງແຕ່ລະແຂວງ ຍາດແຍ່ງເອົາການຊ່ວຍເຫຼືອ ທາງດ້ານທຶນຮອນ ແລະ ອຸປະກອນຮັບໃຊ້ຈາກຄະນະນໍາຂອງແຂວງ ເພື່ອອໍານວຍຄວາມສະດວກໃນການຈັດຕັ້ງປະຕິບັດບັນດາວຽກງານຂອງຕົນໃຫ້ມີປະສິດທິພາບ ແລະ ປະສິດທິຜົນສູງ.
ໂດຍ: ສີຍອງ ພອນທະຈັນ