ພິທີລະນຶກວັນສາກົນເພື່ອລືບລ້າງຄວາມຮຸນແຮງຕໍ່ແມ່ຍິງ 25 ພະຈິກ ຄົບຮອບ 24 ປີ
ໃນຕອນເຊົ້າ ວັນທີ 25 ພະຈິກ 2024 ເວລາ 6 ໂມງ 00 ນາທີ-7ໂມງ 30 ນາທີ ແຂວງຊຽງຂວາງໄດ້ຈັດຕັ້ງພິທີສະເຫຼີມສະຫຼອງ ວັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ວັນສົນທິສັນຍາວ່າດ້ວຍສິດທີເດັກ, ວັນເດັກໂລກຂື້ນຢ່າງເປັນທາງການ ເປັນປະໂດຍ ທ່ານ ບົວເງິນ ຫຸມໄຊຍະພົມ ຄະນະປະຈໍາພັກແຂວງ ຮອງເຈົ້າແຂວງຊຽງຂວາງ, ມີບັນດາທານຄະນະປະຈໍາພັກແຂວງ, ກໍາມະການພັກແຂວງ, ຄະນະພັກ-ຄະນະພະແນກ, ລັດວິສາຫະກິດ, ປກສ, ປກຊ, ໂຮງຮຽນ, ຄອບຄົວການນໍາແຂວງ, ພະນັກງານ-ລັດຖະກອນ, ອົງການຈັດຕັ້ງມະຫາຊົນຕະຫຼອດຮອດສະມາຊິກສະຫະພັນແມ່ຍິງບັນດາພະແນກການ, ກົມກອງອ້ອມຂ້າງແຂວງເຂົ້າຮ່ວມຢ່າງເປັນຂະບວນການຟົດຟື້ນ.
ໃນພິທີ ທ່ານ ບົວເງິນ ຫຸມໄຊຍະພົມ ຄະນະປະຈໍາພັກແຂວງຮອງເຈົ້າແຂວງຊຽງຂວາງໄດ້ ຜ່ານສານຂອງພະນະທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ພາຍໃຕ້ຫົວຂໍ້” ກ້າວເຂົ້າສູ່ 30 ປີ ແຫ່ງການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງຮ່ວມກັນ ເພື່ອຍຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ດັ່ງທີ່ບັນດາທ່ານຮູ້ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງຍັງມີແຜ່ລາມໄປທົ່ວທຸກມຸມໂລກ ແລະ ເກີດຂື້ນຢູ່ໃນຫຼາຍຮູບແບບທີ່ເປັນການລະເມີດສິດທິມະນຸດ ພື້ນຖານແມ່ຍິງ ແລະ ເດັກຍິງ. ອີງຕາມຂໍ້ມູນອົງການສະຫະປະຊາຊາດເພື່ອສິດທິຂອງແມ່ຍິງ ໃຫ້ຮູ້ວ່າໃນທົ່ວໂລກຍັງມີແມ່ຍິງປະມານ 736 ລ້ານຄົນເກືອບ 1 ໃນ 3 ທີ່ປະສົບຄວາມຮຸນແຮງທາງຮ່າງກາຍ ຫຼື ທາງເພດໂດຍຄູ່ຮ່ວມຊີວິດ, ບຸກຄົນອື່ນ ຫຼື ທັງສອງກຸ່ມຄົນຢ່າງໜ້ອຍສອງຄັ້ງໃນຊ່ວງຊີວິດຂອງຕົນ. ໃນປີທີຜ່ານມາແມ່ຍິງ ແລະ ເດັກຍິງອາຍຸລະຫວ່າງ 15-49 ປີ 1 ໃນ 8 ຄົນໄດ້ປະເຊີນກັບຄວາມຮຸນແຮງຈາກຄູ່ຮ່ວມຊີວິດ. ໃນປີ 2024 ນີ້, ສປປ ລາວ ໄດ້ເອົາໃຈໃສ່ສ້າງຄວາມເຂັ້ມແຂງໃຫ້ກົນໄກທີ່ໃຫ້ບໍລິການຊ່ວຍເຫຼືອແມ່ຍິງ ແລະ ເດັກຍິງທີຖືກເຄາະຮ້າຍຈາກຄວາມຮຸນແຮງໂດຍໄດ້ຮັບຮອງເອົາຫຼັກການຊ່ວຍເຫຼືອທີ່ວ່າ “ບໍ່ມີປະຕູໃດທີ່ຜິດ”. ພ້ອມນັ້ນກໍໄດ້ຝຶກອົບຮົມໃຫ້ກັບພະນັກງານ, ເຈົ້າໜ້າທີ່ ໃຫ້ບໍລິການຊ່ວຍເຫຼືອຜູ້ຖືກເຄາະຮ້າຍຂັ້ນສູນກາງໃນ 6 ແຂວງ ແລະ 10 ເມືອງ, ລວມທັງໝົດ 700 ເທື່ອຄົນ, ຍິງ 630 ເທື່ອຄົນ, ຊາຍ 70 ເທື່ອຄົນ. ແຕ່ງຕັ້ງຄະນະປະສານງານ ແລະ ສົ່ງຕໍ່ໃນ 6 ແຂວງ ແລະ 6 ເມືອງ; ຂະຫຍາຍສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍໄດ້ 5 ສູນ, ປັບປຸງສະຖານທີ່ບໍລິການຊ່ວຍເຫຼືອຜູ້ເຄາະຮ້າຍໃຫ້ໂຮງໝໍສູນກາງ 2 ແຫ່ງຄື: ໂຮງໝໍມະໂຫສົດ, ໂຮງໝໍແມ່ ແລະ ເດັກ ແລະ ສ້າງຈຸດບໍລິການປະຕູດຽວ(ການບໍລິການເພື່ອສຸຂະພາບ)ແຫ່ງທໍາອິດຂອງ ສປປ ລາວ ທີ່ໂຮງໝໍມະໂຫສົດ ແລະ ມີເບີສາຍດ່ວນ 1527.
ຄວາມສະເໝີພາບຍິງ-ຊາຍ ແລະ ລືບລ້າງທຸກຮູບການຈໍາແນກຕໍ່ແມ່ຍິງຜ່ານຂະບວນການ ແລະ ວິທີການຕ່າງໆເພື່ອໃຫ້ທຸກຄົນໃນສັງຄົມປັບປ່ຽນທັດສະນະຄະຕິ ແລະ ພຶດຕິກໍາທີ່ເປັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ຕ້ອງເຂົ້າໃຈຮ່ວມກັນວ່າການກະທໍາຄວາມຮຸນແຮງຕໍ່ແມ່ຍິງ ແລະ ເດັກຍິງເປັນການລະເມີດສິດທິມະນຸດພື້ນຖານຂອງແມ່ຍິງ ແລະ ມີຄວາມຜິດທາງກົດໝາຍ. ພາຍໃຕ້ຄໍາຂັວນ” ຮ່ວມທຶນ, ລົງທຶນໃສ່ການປ້ອງກັນການຊ່ວຍເຫຼືອແມ່ຍິງ ແລະ ເດັກນ້ອຍທີ່ຖຶກເຄາະຮ້າຍຈາກຄວາມຮຸນແຮງ” ໃນງານໄດ້ມີການສ້າງຂະບວນການກິດຈະກໍາ ເຕັ້ນແອວໂຣບິກ ແລະ ຍ່າງເພື່ອສຸຂະພາບຢ່າງເປັນທາງການ.
ຂຽນໂດຍ: ບົວສີ ພັນທະສອນ