ແຂວງຊຽງຂວາງ ຈັດຕັ້ງປາຖະກະຖາ ວັນປະຫວັດສໍາຄັນປະຈໍາເດືອນ ທັນວາ ແລະ ເຊື່ອມຊຶມບັນດາຕິນິກໍາຂອງພັກ-ລັດ
ໃນວັນທີ 13 ທັນວາ 2024 ຜ່ານມານີ້ ທີ່ຫ້ອງປະຊຸມໃຫຍ່ ຫ້ອງວ່າການແຂວງ ຊຽງຂວາງ ໄດ້ຈັດຕັ້ງພິທີໂຄສະນາ-ປາຖະກະຖາ ວັນສະຖາປານາ ສປປ ລາວ ຄົບຮອບ 49 ປີ; ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 104 ປີ ແລະ ເຊື່ອມຊຶມບັນດານິຕິກໍາທີ່ສໍາຄັນຂອງພັກ-ລັດ. ໂດຍໃຫ້ກຽດເປັນປະທານກອງປະຊຸມ ຂອງສະຫາຍ ບຸນຈັນ ສີວົງພັນ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ ແລະ ການເຂົ້າຮ່ວມຂອງບັນດາ ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ສະພາປະຊາຊົນ, ເລຂາຄະນະພັກຮາກຖານ, ເລຂາໜ່ວຍພັກ, ພະນັກງານຫຼັກແຫຼ່ງຂອງບັນດາພະແນກການ, ກົມກອງ, ກໍາລັງຫຼວງປະຈໍາແຂວງ(702,643,101), ທະນາຄານແຫ່ງ ສປປ ລາວ ແລະ ລັດວິສາຫະກິດໃນທົ່ວແຂວງເຂົ້າຮ່ວມຟັງທັງໝົດ 145 ສະຫາຍ, ຍິງ 29 ສະຫາຍ.
ໃນພິທີດັ່ງກ່າວ ສະຫາຍ ໜໍບີ ຫາຕົງປາວ ໄດ້ໃຫ້ກຽດຂຶ້ນປາຖະກະຖາ ວັນສະຖາປານາ ສປປ ລາວ ຄົບຮອບ 49 ປີ ເຊິ່ງສະຫາຍໄດ້ຫວນຄືນມູນເຊື້ອ ຂອງ ວັນຊາດທີ 2 ທັນວາ ມັນແມ່ນວັນທີ່ມີຄວາມໝາຍຄວາມສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຕ້ານການຮຸກຮານຂອງຈັກກະພັດພວກປະຕິການຂາຍຊາດ, ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ທັງເປັນວັນແຫ່ງການກ້າວສູ່ຍຸກສະໄໝແຫ່ງການສ້າງປະເທດລາວສັນຕິພາບ ເອກະລາດ ປະຊາທິປະໄຕ ເອກະພາບ ວັດທະ ນະຖາວອນ ເຊິ່ງປະທານ ໄກສອນ ພົມວິຫານ ໄດ້ຕີລາຄາວັນທີ 2 ທັນວາ ປີ 1975 ວ່າ: “ບໍ່ທັນມີເວລາໃດທີ່ປະຊາຊົນເຮົາ ເຊິ່ງເປັນຜູ້ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະອັນສົມບູນຢ່າງສະຫງ່າລາສີຄືແນວນີ້ຈັກເທື່ອ, ໄຊຊະນະນັ້ນບໍ່ສະເພາະແຕ່ໄດ້ຟື້ນຟູຄວາມເປັນເອກະພາບຂອງປະເທດເຮົາ, ຫາກຍັງເປັນຄັ້ງທໍາອິດທີປະຊາຊົນບັນດາເຜົ່າຜູ້ເຄີຍດໍາລົງຊີວິດເປັນທາດ ໄດ້ກາຍເປັນເຈົ້າຂອງແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສູ່ສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າຂອງປວງຊົນລາວ ກໍຄືຂອງມວນມະນຸດປະກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ”, ຈາກນັ້ນກໍ່ສະເໜີເອກະສານ ວັນຄ້າຍວັນເກີດ ຂອງປະທານ ໄກສອນ ພົມວິຫານ ເຊິ່ງພວກເຮົາຮູ້ແລ້ວວ່າ ປະທານ ໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ເປັນຜູ້ນໍາທີ່ປີຊາສາມາດ, ສະຫຼາດສ່ອງໃສ, ສະດຸ້ງໄວ ແລະ ເປັນຜູ້ທີ່ມີຄຸນງາມຄວາມດີອັນເຫຼືອຟ້າ ລົ້ນແຜ່ນດິນ, ມີນໍ້າໃຈຮັກຊາດອັນສູງສົ່ງ, ນໍ້າໃຈກໍາມະຊີບອັນໜັກແໜ້ນ, ມີຄວາມເດັດດ່ຽວບໍ່ຍອມຈໍານົນຕໍ່ສັດຕູ, ຄວາມສະຫຼຽວສະຫຼາດ ແລະ ຄວາມເສຍ ສະຫຼະເພື່ອປະເທດຊາດ, ເພື່ອປະຊາຊົນຢ່າງບໍ່ມີຂີດຈໍາກັດ, ເປັນຜູ້ນໍາທີ່ດີເລີດ ກ່ຽວກັບຄຸນທາດການເມືອງ ມີຄຸນສົມບັດ ສິນທໍາປະຕິວັດອັນຜ່ອງໃສ, ມີຄວາມຈົງຮັກພັກດີຢ່າງເດັດຂາດຕໍ່ຊາດ ແລະ ປະຊາຊົນ, ມີຄວາມອົດທົນພາກພຽນ ໃນການຄົ້ນຄວ້າຮໍ່າຮຽນ ສະແຫວງຫາຄວາມຮູ້, ເປັນນັກປຸກລະດົມຂົນຂວາຍທີ່ມີວິທີການຄ່ອງແຄ້ວ, ມີວາທະສິນ ແລະ ສີລະປະໃນການເວົ້າ, ການອະທິບາຍຊີ້ແຈງບັນຫາຕ່າງໆຢ່າງມີເຫດມີຜົນ, ມີຊີວິດຊີວາ ແລະ ຈັບໃຈຜູ້ຟັງ. ເຊິ່ງຄຸນສົມບັດດ ແບບແຜນການດໍາລົງຊີວິດເຫຼົ່ານີ້ ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດຕະຫຼອດຮອດພໍ່ແມ່ປະຊາຊົນບັນດາເຜົ່າຄວນຈະຮໍ່າຮຽນ ແລະ ຖືເອົາແບບຢ່າງ, ຮໍ່າຮຽນເອົານໍ້າໃຈຮັກຊາດ, ນໍ້າໃຈເສຍສະຫຼະ, ແບບແຜນການນໍາພາ, ແບບແຜນວິທີເຮັດວຽກ ແລະ ແບບແຜນການດໍາລົງຊີວິດຂອງປະທານ ໄກສອນ ພົມວິຫານ ເພື່ອນໍາໄປຈັດຕັ້ງປະຕິບັດເຂົ້າໃນໜ້າທີ່ວຽກງານຂອງຕົນໃຫ້ເກີດດອກອອກຜົນເປັນຈິງ.
ຫຼັງຈາກປາຖະກະຖາ 2 ວັນປະຫວັດສາດແລ້ວ ກໍ່ໄດ້ສືບຕໍ່ເຊື່ອມຊຶມເອກະສານສໍາຄັນຕ່າງໆຂອງພັກເຊັ່ນ: ສະຫາຍ ບຸນຈັນ ສີວົງພັນໄດ້ຜ່ານມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ສະຫາຍ ນາງ ບົວສີ ນາຖະວົງ ໄດ້ສະເໜີເອກະສານສຶກສາອົບຮົມ-ການເມືອງແນວຄິດສໍາລັບ ສະມາຊິກພັກ, ພະນັກງານ ເພື່ອດໍາເນີນຊີວິດການເມືອງ ໃນທົ່ວພັກ, ສະຫາຍ ສົມພອນ ສີອາໄພ ໄດ້ຜ່ານມະຕິກອງປະຊຸມລັດຖະບານ ປະຈໍາເດືອນພະຈິກ 2024, ສະຫາຍ ບຸນເຮືອງ ສຸລິໄຊ ຜ່ານມະຕິຕົກລົງ ວ່າດ້ວຍການຈັດຕັ້ງພິທີຊາປະນະກິດສົບ ຂອງການນໍາຂັ້ນສູງພັກ-ລັດ, ສະຫາຍ ສີວອນ ອ່ອນລາວົງ ຜ່ານຜົນສໍາເລັດກອງປະຊຸມຄົບຄະນະຄັ້ງທີ 3 ຂອງຄະນະກໍາມະການສູນກາງພັກກອມມູນິດຈີນ ສະໄໝທີ XX, ເຜີຍແຜ່ແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາລາວ-ຈີນ, ຄໍາແນະນໍາ ວ່າດ້ວຍການເພີ່ມທະວີການນໍາພາຊີ້ນໍາຂອງ ຄະນະພັກແຕ່ລະຂັ້ນຕໍ່ການຜັນຂະຫຍາຍຜົນກອງປະຊຸມພົບປະສອງກົມການ ເມືອງສູນກາງພັກ ລາວ-ຫວຽດນາມ ປະຈໍາປີ 2025, ສະຫາຍ ຄໍາຜຸຍ ໂນລາ ສະເໜີເອກະສານ ປະຫວັດຄວາມເປັນມາຂອງລັດວິສາຫະກິດ ສວນພູຄໍາ ຈໍາກັດຜູ້ດຽວ ແລະ ສະຫາຍ ຄໍາວຽນ ສີຫານາດ ຜ່ານຄໍາແນະນໍາ ວ່າດ້ວຍການສ້າງຂະບວນການແຂ່ງຂັນຍ້ອງຍໍ ເພື່ອສະເຫຼີມສະຫຼອງ 3 ວັນປະຫວັດສາດຂອງພັກ, ຂອງຊາດ ປີ 2025 ແລະ ຢ່າງເປັນຂະບວນຟົດຟື້ນ.
ໃນຕອນທ້າຍກອງປະຊຸມ ສະຫາຍ ເລຂາພັກແຂວງ ເຈົ້າແຂວງ ຊຽງຂວາງ ປະທານ ກອງປະຊຸມ ໄດ້ໂອ້ລົມ ແລະ ມີທິດຊີ້ນໍາຕໍ່ກອງປະຊຸມ ເຊິ່ງສະຫາຍໄດ້ສະເໜີໃຫ້ ຄະນະປະຈໍາພັກແຂວງ, ກໍາມະການພັກແຂວງ, ຄະນະພັກຂອງສອງກໍາລັງ, ເລຂາຄະນະພັກຮາກຖານ, ເລຂາໜ່ວຍພັກ, ແລະ ບັນດາທະນາຄານ ຈົ່ງເປັນເຈົ້າການ ນໍາພາໃນການນໍາເອົາເນື້ອໃຈຈິດໃຈຂອງກອງປະຊຸມ ພ້ອມທັງຄັດຈ້ອນເອົາເນື້ອໃນເອກະສານທີ່ຕິດພັນເຖິງວຽກງານຂອງຕົນເອງ ເພື່ອສືບຕໍ່ນໍາພາໃນການຈັດຕັ້ງເຊື່ອມຊຶມຜັນຂະຫຍາຍ ແລະ ຈັດຕັ້ງປາຖະກະຖາ ຢູ່ໃນກົມກອງ, ຢູ່ໃນຄວາມຮັບຜິດຊອບຂອງຕົນ ໃຫ້ມີເນື້ອໃນເລິກເຊິ່ງ, ກວ້າງຂວາງ, ທົ່ວເຖິງທຸກເປົ້າໝາຍ, ພ້ອມທັງລາຍງານຄະນະຮັບຜິດຊອບເພື່ອຕິດຕາມ ແລະ ສະຫຼຸບລາຍງານຄະນະພັກຂັ້ນເທິງຕາມກໍານົດເວລາ.
( ຂ່າວ ທ. ນູຢ່າງ ຢົງມາ )