ເປີດຂະບວນການ
ເພື່ອຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ຢູ່ແຂວງຊຽງຂວາງ
ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ, ທົ່ວປວງຊົນລາວບັນດາເຜົ່າ ເວົ້າລວມ ເວົ້າສະເພາະ ຄະ ນະພັກ-ອົງການປົກຄອງແຕ່ລະຂັ້ນ, ສະມາຊິກພັກ, ພະນັກງານ, ລັດຖະກອນ ແລະ ປະຊາຊົນບັນດາ ເຜົ່າໃນທົ່ວແຂວງຊຽງຂວາງ ພວມຈັດຕັ້ງການເຊື່ອມຊຶມ, ການສະເຫຼີມສະຫຼອງເນື່ອງໃນໂອກາດວັນກໍາມະກອນສາກົນ ຄົບຮອບ 138 ປີ, ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ຄົບຮອບ 65 ປີ ແລະ ວິ ລະກໍາໂຕນຄຸກຢ່າງມະຫັດສະຈັນຂອງບັນດາທ່ານຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 64 ປີ ເປັນຂະບວນການຟົດຟື້ນ.
ເພື່ອເປັນການຈັດຕັ້ງປະຕິບັດຕາມຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 08 ສິງຫາ 2023 ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 211/ຄຈສພ, ລົງວັນທີ 16 ສິງຫາ 2023 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ຄໍາແນະນໍາຂອງຄະນະໂຄສະນາອົບຮົມສູນກາງພັກ ສະບັບເລກທີ 254/ຄອສພ, ລົງວັນທີ 06 ພະຈິກ 2023 ກ່ຽວກັບການສ້າງຂະບວນການ ເພື່ອກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ.
ໃນວັນທີ 22 ພຶດສະພາ 2024, ແຂວງຊຽງຂວາງ ໄດ້ຈັດພິທີເປີດຂະບວນການ ເພື່ອຊົມເຊີຍຜົນສໍາເລັດກອງປະຊຸມໃຫຍ່ຂອງໜ່ວຍພັກຮາກຖານບ້ານ ແລະ ຂໍ່ານັບຮັບຕ້ອນການກະກຽມດໍາເນີນກອງປະຊຸມໃຫຍ່ຂອງອົງຄະນະພັກເມືອງ, ກອງປະຊຸມໃຫຍ່ອົງຄະນະພັກກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ ແລະ ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຊຽງຂວາງ, ພິທີໄດ້ຈັດຂຶ້ນຢູ່ຕໍ່ໜ້າອະນຸສາວະລີ ທ່ານ ພູມີ ວົງວິຈິດ ໂດຍການເປັນກຽດເຂົ້າຮ່ວມເປັນປະທານຂອງສະຫາຍ ບຸນຈັນ ສີວົງພັນ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ-ແຂວງຊຽງຂວາງ, ມີບັນດາສະຫາຍ ຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າ-ຮອງຫົວໜ້າກອງບັນຊາການປ້ອງກັນຊາດ-ປ້ອງກັນຄວາມສະ ຫງົບ, ພະແນກການ, ກົມກອງ, ລັດວິສາຫະກິດ, ທະນາຄານ ຕະຫຼອດຮອດສະມາຊິກພັກ, ພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ 400 ກວ່າຄົນ, ພ້ອມນັ້ນ ທ່ານ ຄອນສະໝຸດ ບຸນແພງພັນ ກໍາມະການພັກແຂວງ ຫົວໜ້າພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງ, ຮອງຫົວໜ້າອະນຸກໍາມະການຂະບວນການ, ໂຄສະນາຖະແຫຼ່ງຂ່າວ ໄດ້ລາຍງານກ່ຽວກັບການກະ ກຽມຄວາມພ້ອມດ້ານຂະບວນການ, ກິດຈະກໍາຕ່າງໆ ທີ່ຈະໄດ້ເຄື່ອນໄຫວຈັດຕັ້ງປະຕິບັດຕະຫຼອດນີ້ຮອດກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ທີ່ຈະໄດ້ຈັດຂຶ້ນໃນທ້າຍປີ 2025.
ເພື່ອເປັນການປຸກລະດົມທົ່ວພັກ, ທົ່ວກໍາລັງປະກອບອາວຸດ, ບັນດາຫົວໜ່ວຍທຸລະກິດ ແລະ ປະຊາຊົນບັນດາ ເຜົ່າໃນທົ່ວແຂວງຊຽງຂວາງ ໃຫ້ມີສ່ວນຮ່ວມ, ປະກອບສ່ວນຊຸກຍູ້ການດໍາເນີນກອງປະຊຸມໃຫຍ່ 3 ຂັ້ນຂອງແຂວງ ໃຫ້ກາຍເປັນຂະບວນການຢ່າງກວ້າງຂວາງ, ຟົດຟື້ນ ແລະ ຕໍ່ເນື່ອງ, ເພື່ອຂໍ່ານັບຮັບຕ້ອນກອງປະຊຸມໃຫຍ່ຄະນະພັກຮາກຖານ, ໜ່ວຍພັກຮາກຖານ, ກອງປະຊຸມໃຫຍ່ຂອງອົງຄະນະພັກເມືອງ, ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຊຽງຂວາງ ໃຫ້ສໍາເລັດຕາມຄາດໝາຍທີ່ກໍານົດໄວ້. ການສ້າງຂະບວນການໃນຄັ້ງນີ້ໄດ້ມີກິດຈະກໍາເຕັ້ນແອລໂລບິກ, ສາວຊຽງຂວາງທັງງາມທັງເກັ່ງ, ຍ່າງອອກກໍາລັງກາຍ ເພື່ອສຸຂະ ພາບ, ສະແດງສິລະປະ, ລັ່ນຄ້ອງ 9 ບາດ, ຕີກອງຄູ່ ແລະ ຫຼິ້ນກິລາບານເຕະ, ກິລາເປຕັ່ງ ດ້ວຍບັນຍາກາດອັນເບີກບານມ່ວນຊື່ນ.
ໂດຍ: ສາຍທອງ ວື່ໄຊຫວັງ