ສໍາມະນາວິທະຍາສາດ 70 ປີ ພາຍໃຕ້ການນໍາພາຂອງພັກທີ່ມີກຽດສະຫງ່າ
ວັນທີ 12 ມີນາ 2025 ຢູ່ທີ່ຫ້ອງປະຊຸມຂອງພະແນກແຜນການ ແລະ ການລົງທຶນແຂວງຊຽງຂວາງ ຄະນະຮັບຜິດຊອບສະເຫຼີມສະຫຼອງ 3 ວັນປະຫວັດສາດຂັ້ນສູນກາງ ໄດ້ສົມທົບຄະນະພັກອົງການປົກຄອງແຂວງຊຽງຂວາງ ໄດ້ຈັດກອງປະຊຸມສໍາມະນາວິທະຍາສາດ ໃນຫົວຂໍ້ 70 ປີ ພາຍໃຕ້ການນໍາພາຂອງພັກທີ່ມີກຽດສະ ຫງ່າ ໂດຍການເປັນປະທານຂອງທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປລາວ, ມີພະນັກງານນໍາພາຄຸ້ມຄອງ, ພະນັກງານການນໍາຂັ້ນສູງຂອງ 3 ແຂວງຄື: ແຂວງຊຽງຂວາງ, ແຂວງຫົວພັນ ແລະ ແຂວງໄຊສົມບູນ, ພ້ອມດ້ວຍພະນັກງານຫຼັກແຫຼ່ງຈາກ 3 ແຂວງ ແລະ ການນໍາຂອງສູນກາງເຂົ້າຮ່ວມ.
ໃນພິທີ ທ່ານ ບຸນຈັນ ສີວົງພັນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆຊຽງຂວາງ ໄດ້ກ່າວຕ້ອນຮັບ ແລະ ລາຍງານສະພາບການພັດທະນາເສດ ຖະກິດ-ສັງຄົມຂອງແຂວງຊຽງຂວາງ ໃນໄລຍະຜ່ານມາໂດຍຫຍໍ້, ຈາກນັ້ນ, ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປລາວ ໄດ້ເລົ່າຄືນມູນເຊື້ອການກໍາເນີດເຕີບໃຫຍ່ຂອງພັກປະຊາຊົນປະຕິວັດລາວ 70 ປີ ແຫ່ງການນໍາພາຂອງພັກອັນສະຫຼາດສ່ອງໃສ 
ພ້ອມທັງໄດ້ນໍາພາການສໍາມະນາວິທະຍາສາດ 70 ປີ ພາຍໃຕ້ການນໍາພາຂອງພັກທີ່ມີກຽດສະຫງ່າ ເພື່ອເປັນການສຶກສາຄົ້ນຄວ້າທາງດ້ານທິດສະດີ ແລະ ພຶດຕິກໍາ ພາຍໃຕ້ການນໍາພາຂອງພັກໃນໄລຍະຜ່ານມາຕະຫຼອດ 70 ປີແຫ່ງການກໍ່ຕັ້ງ ແລະ ນໍາພາ, ພາລະກິດປະຕິວັດ, ເຊິ່ງໄດ້ໃຫ້ບັນດານັກຄົ້ນຄ້ວາສະເໜີຫົວຂໍ້ວິ ທະຍາສາດ ຈໍານວນ 10 ບົດຄື: 1. ການກໍາເນີດຂອງພັກປະຊາຊົນປະຕິວັດລາວ ເປັນບາດລ້ຽວປະຫວັດສາດຕັດສິນໄຊຊະນະຂອງການປະຕິວັດ 2. ພັກປະຊາຊົນລາວນໍາພາລະກິດປົດປ່ອຍຊາດຢ່າງສົມບູນ 3. ພັກກໍ່ສ້າງ-ປັບປຸງຕົນເອງຢ່າງບໍ່ຢຸດຢັ້ງ ເພື່ອຮັບປະກັນໄຊຊະນະຂອງການປະຕິວັດໃນແຕ່ລະໄລຍະ 4. ພັກນໍາພາສ້າງລັດ ຂອງປະຊາຊົນໂດຍປະຊາຊົນເພື່ອປະຊາຊົນ 5. ພັກນໍາພາພັດທະນາເສດຖະກິດຕະຫຼາດຕາມທິດສັງຄົມນິຍົມ 6. ພັກນໍາພາພັດທະນາວັດທະນະທໍາ-ສັງຄົມ ເພື່ອຄວາມຢູ່ດີກິນດີຂອງປະຊາຊົນບັນດາເຜົ່າ 7. ພັກນໍາພາເຕົ້າໂຮມຄວາມສາມັກຄີເປັນປຶກແຜນທົ່ວປວງຊົນລາວທັງຊາດ 8. ພັກນໍາພາວຽກງານປ້ອງກັນຊາດ ບົນເສັ້ນທາງກ້າວສູ່ຈຸດໝາຍສັງຄົມນິຍົມ 9. ພັກນໍາພາກໍ່ສ້າງກໍາລັງປ້ອງກັນຄວາມສະຫງົບ ເຂັ້ມແຂງ, ມີແບບແຜນທັນສະໄໝ 10. ພັກນໍາພາເປີດກວ້າງການພົວພັນຮ່ວມມືກັບຕ່າງປະເທດ.
ຈາກນັ້ນ, ທ່ານ ປອ ດາວສະຫວັນ ເຄືອມີໄຊ ຮອງຫົວໜ້າສະຖານບັນການເມືອງ ແລະ ການປົກຄອງແຫ່ງຊາດ ໄດ້ນໍາສະເໜີບົດຮຽນການສ້າງເສດຖະກິດເອກະ ລາດເປັນເຈົ້າຕົນເອງ ຂອງ ສສ ຫວຽດນາມ ແລະ ທ່ານ ປອ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ນໍາສະເໜີບົດຮຽນສໍາມະນາທິດສະດີ 2 ພັກລາວ – ກູບາ ຄັ້ງທີ II ແລະ ຂອງ 2 ພັກລາວ-ຈີນ ຄັ້ງທີ XII, ເຊິ່ງເຕັມໄປດ້ວຍຄວາມໝາຍຄວາມສໍາຄັນ ແລະ ເປັນບົດຮຽນທີ່ດີໃຫ້ແກ່ບັນດາທ່ານຜູ້ເຂົ້າຮ່ວມກອງປະຊຸມ ເພື່ອໄປໝູນໃຊ້ເຂົ້າໃນວຽກງານຕົວຈິງ.
ໂດຍ: ສີຍອງ ພອນທະຈັນ