ສະຫາຍ ປອ ຄໍາພັນ ເຜີຍຍະວົງ ຄະນະເລຂາທິການສູນກາງພັກ
ຫົວໜ້າຄະນະໂຄສະນາອົບຮົມສູນກາງພັກ ລົງເຄື່ອນໄຫວເຮັດວຽກຢູ່ແຂວງຊຽງຂວາງ
ໃນເວລາ 13: 30 ນາທີ ຂອງວັນທີ 21 ພະຈິກ 2024 ຢູ່ທີ່ຫ້ອງປະຊຸມໃຫຍ່ຫ້ອງວ່າການແຂວງຊຽງຂວາງ ສະຫາຍ ປອ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານທິດສະດີສູນກາງພັກ, ຮອງຫົວໜ້າອະນຸກໍາມະການເນື້ອໃນກອງປະຊຸມໃຫຍ່ ຄັ້ງທີ XII ຂອງພັກ ພ້ອມດ້ວຍຄະນະ, ໄດ້ລົງເຄື່ອນໄຫວເຮັດວຽກ ຢູ່ແຂວງຊຽງຂວາງ ໂດຍໄດ້ພົບປະໂອ້ລົມກັບຄະນະພັກ, ພະນັກງານການນໍາຂອງແຂວງຊຽງຂວາງ ໂດຍມີສະຫາຍ ໜໍບີ ຫາຕົ່ງປາວ ຮອງເລຂາຄະນະບໍລິຫານງານພັກແຂວງ, ຜູ້ຊີ້ນໍາວຽກງານການເມືອງ-ແນວຄິດຂັ້ນແຂວງ, ມີຄະນະປະຈໍາພັກແຂວງ, ກຳມະການພັກແຂວງ, ຫົວໜ້າ-ຮອງຫົວໜ້າພະແນກການຂອງແຂວງ ພ້ອມດ້ວຍພະນັກງານຄະນະໂຄສະນາອົບຮົມແຂວງ ເຂົ້າຮ່ວມ.
ໃນພິທີ ສະຫາຍ ໜໍບີ ຫາຕົ່ງປາວ ຮອງເລຂາພັກແຂວງ ໄດ້ລາຍງານຫຍໍ້ກ່ຽວກັບແຜນພັດທະນາເສດຖະກິດ-ສັງຄົມຂອງແຂວງ ແລະ ການກະກຽມກອງປະຊຸມໃຫຍ່ 3 ຂັ້ນຂອງພັກ, ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກໃນໄລຍະຜ່ານມາຢູ່ແຂວງຊຽງຂວາງ ເປັນຕົ້ນແມ່ນການຜະລິດກະສິກໍາ ແລະ ການລ້ຽງສັດໃຫຍ່ເປັນສິນຄ້າ ແລະ ການຄຸ້ມຄອງບໍລິຫານລັດຕາມລະບຽບກົດໝາຍ ຈາກນັ້ນ,
ສະຫາຍ ຄໍາກອງ ທໍາມະເທວາ ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ໄດ້ຂຶ້ນຜ່ານເອກະສານ ແລະ ນິຕິກໍາຕ່າງໆກ່ຽວກັບການກະກຽມສະເຫຼີມສະຫຼອງ 3 ວັນປະຫວັດສາດ ໃນປີ 2025 ເປັນປີທີ່ມີຄວາມໝາຍສໍາຄັນສໍາລັບທົ່ວພັກ-ລັດ, ທີ່ທົ່ວກໍາລັງປະກອບອາວຸດ ແລະ ປວງຊົນລາວທັງຊາດ, ກະກຽມສະເຫຼີມສະຫຼອງ 3 ວັນປະຫວັດສາດຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປານາ ສປປລາວ ຄົບຮອບ 50 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ, ເພື່ອເປັນການຫວນຄືນມູນເຊື້ອແຫ່ງການຕໍ່ສູ້ປົດປ່ອຍຊາດຢ່າງມີໄຊ ແລະ ຢັ້ງຢືນຄືນໝາກຜົນຕົວຈິງທີ່ພັກຍາດມາໄດ້ໃນໄລຍະຜ່ານມາ, ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນກ້າວໜ້າ.
ຈາກນັ້ນ, ສະຫາຍ ປອ ຄໍາພັນ ເຜີຍຍະວົງ ປະທານກອງປະຊຸມໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາກ່ຽວກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ການກະກຽມສະເຫຼີມສະຫຼອງ 3 ວັນປະຫວັດສາດ ຊຶ່ງມີຫຼາຍໜ້າວຽກ, ຫຼາຍກິດຈະກໍາທີ່ຈະໄດ້ກະກຽມຕົ້ນຕໍແມ່ນດ້ານເນື້ອໃນ, ເອກະສານຕ່າງໆ ການດໍາເນີນຊີວິດການເມືອງພາຍໃນພັກ, ຂະບວນການທາງດ້ານກິລາກາຍຍະກໍາ, ສິລະປະວັນນະຄະດີ ການວາງສະແດງສິນຄ້າກະສິກໍາ, ຫັດຖະກໍາຕາມຄວາມເໝາະສົມຂອງທ້ອງຖິ່ນ ແລະ ໃຫ້ແຕ່ລະພາກສ່ວນແຕ່ງຕັ້ງຄະນະຮັບຜິດຊອບຕາມພາລະບົດບາດ, ສິດ ແລະ ໜ້າທີ່ຮັບຜິດຊອບຂອງຕົນຢ່າງລະອຽດຈະແຈ້ງ, ການສະເຫຼີມສະຫຼອງຕ້ອງແທດເໝາະກັບ ເງື່ອນໄຂ ແລະ ສະພາບຄວາມເປັນຈິງທ້ອງຖິ່ນ ໃຫ້ເປັນຂະບວນຟົດຟື້ນ ແລະ ມີບັນຍາກາດ, ການສະເຫຼີມສະຫຼອງຕ້ອງບົນຈິດໃຈພື້ນຖານການປະຢັດ, ພ້ອມທັງສືບຕໍ່ເຮັດວຽກງານສຶກສາອົບຮົມການເມືອງ-ແນວຄິດໃຫ້ທົ່ວເຖິງ ແລະ ປຸກລະດົມໃຫ້ສັງຄົມຖືເອົາວຽກງານໂຄສະນາອົບຮົມເປັນວຽກງານໜຶ່ງທີ່ສໍາຄັນຂອງພັກ. ຕິດພັນກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ການກະກຽມຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XII ຂອງຄະນະບໍລິຫານງານສູນກາງພັກ.
ໂດຍ: ສີຍອງ ພອນທະຈັນ