ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ
ແຂວງຊຽງຂວາງໄດ້ຈັດພິທີຮັບຊົມການຖ່າຍທອດສົດ ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ທີ່ນະຄອນຫຼວງວຽງຈັນ ພິທີໄດ້ຈັດຂຶ້ນຢູ່ທີ່ຫ້ອງປະຊຸມຂອງພະແນກແຜນການ ແລະ ການລົງທຶນແຂວງ ໃນວັນທີ 22 ມີນາ 2025 ໂດຍເປັນກຽດເຂົ້າຮ່ວມຂອງສະຫາຍ ບຸນຈັນ ສີວົງພັນ ກໍາມະການສູນກາງພັກເລຂາພັກແຂວງ ເຈົ້າແຂວງໆຊຽງຂວາງ, ສະຫາຍ ບຸນຕົ້ນ ຈັນທະພອນ ອາດີດເລຂາພັກແຂວງ ເຈົ້າແຂວງ, ພ້ອມດ້ວຍການນໍາພັກ-ລັດຂັ້ນແຂວງ, ອາດີດການນໍາຂັ້ນແຂວງ, ພະນັກງານອາວຸໂສບໍານານ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ ແລະ ພະນັກງານສະມາຊິກພັກເຂົ້າຮ່ວມ.
ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ຢູ່ທີ່ນະຄອນຫຼວງວຽງຈັນ ໄດ້ຖ່າຍທອດສົດຜ່ານທາງໂທລະພາບແຫ່ງຊາດລາວ ໂດຍໄດ້ຮັບຊົມ, ຮັບຟັງສູນທອນພົດຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານພັກປະຊາຊົນປະຕິວັດລາວ ປະທານປະເທດແຫ່ງ ສປປລາວ ເຊິ່ງສະຫາຍໄດ້ ສະແດງຄວາມຢື້ຢາມຖາມຂ່າວ ແລະ ຍ້ອງຍໍຊົມເຊີຍຕໍ່ພີ່ນ້ອງຮ່ວມຊາດ ທີ່ຜ່ານຜ່າຄວາມຫຍຸ້ງຍາກລໍາບາກດ້ວຍຄວາມອົງອາດກ້າຫານ ທີ່ໄດ້ອຸດທິດສະຕິປັນຍາ ແລະ ເຫື່ອແຮງທີ່ໄດ້ເສຍສະຫຼະເລືອດເນື້ອທຸກສິ່ງທຸກຢ່າງ ເພື່ອຜົນປະໂຫຍດລວມຂອງຊາດ ແລະ ໄດ້ລະນຶກເຖິງຄຸນງາມຄວາມດີຂອງບັນດາທ່ານຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ແລະ ໄດ້ຫວນຄືນປະຫວັດການກໍາເນີດ, ເຕີບໃຫຍ່ຂະຫຍາຍຕົວຂອງພັກ ແລະ ມູນເຊື້ອອັນດີງາມຂອງພັກ. ຕະຫຼອດໃນໄລຍະ 70 ປີຜ່ານມາ ການນໍາພາຂອງພັກອັນສະຫຼາດສ່ອງໃສ ສາມາດຢັ້ງຢືນໄດ້ວ່າ ພັກເຮົາສາມາດຜ່ານຜ່າຄວາມຫຍຸ້ງຍາກຢ່າງລະອິດລະອ້ຽວ ນາໆປະການ ກໍຍ້ອນການນໍາພາຂອງພັກປະຊາຊົນປະຕິວັດລາວ, ດ້ວຍຄວາມສາມັກຄີປອງດອງຂອງປະຊາຊົນລາວບັນດາເຜົ່າ ທີ່ມີນໍ້າໃຈຮັກຊາດ ແລະ ຄວາມອົງອາດກ້າຫານ ເພື່ອສ້າງຄວາມເຂັ້ມແຂວງດ້ວຍຕົນເອງ ເດີນຕາມເສັ້ນທາງກ້າວຂຶ້ນສູ່ສັງຄົມນິຍົມ.
ພາຍຫຼັງສໍາເລັດພິທີຖ່າຍທອດສົດຈາກສູນກາງແລ້ວ ແຂວງຊຽງຂວາງຍັງໄດ້ຈັດຕັ້ງການປະດັບຫຼຽນກາ ລະນຶກ 70 ປີ ວັນສ້າງຕັ້ງພັກປະຊາຊົນລາວປະຕິວັດລາວ ໃຫ້ສະມາຊິກພັກທີ່ເປັນອາດີດການນໍາ, ພະນັກງານອາວຸໂສບໍານານ ແລະ ພະນັກງານການນໍາຂອງແຂວງ ຢ່າງສົມກຽດ.
ໂດຍ: ສີຍອງ ພອນທະຈັນ