ກົມໂຄສະນາ ຄະນະໂຄສະນາອົບຮົມສູນກາງພັກ ລົງເຄື່ອນໄຫວເຮັດວຽກ ຢູ່ແຂວງຊຽງຂວາງ
ໃນລະຫວ່າງວັນທີ 15-16 ສິງຫາ 2024 ທ່ານ ອານົງສັກ ອິນທະວົງ ຄະນະພັກ, ຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ ແລະ ທ່ານ ວັນນະສິນ ຜະລີຈັນ ຄະນະພັກ, ຮອງຫົວໜ້າຄະນະໂຄສະນາອົບ ຮົມແຂວງຊຽງຂວາງ ພ້ອມດ້ວຍທີມງານ ໄດ້ລົງເຄື່ອນໄຫວເກັບກໍາຂໍ້ມູນ, ສໍາພາດການນໍາຂອງແຂວງ, ຫົວໜ້າຄະນະໂຄສະນາອົບຮົມແຂວງ ແລະ 3 ເມືອງ (ເມືອງຄຳ, ເມືອງແປກ, ເມືອງຄູນ) ຢູ່ແຂວງຊຽງຂວາງ.
ຈຸດປະສົງຂອງການລົງເຄື່ອນໄຫວວຽກງານໃນຄັ້ງນີ້ ແມ່ນເກັບກໍາຂໍ້ມູນການຜັນຂະຫຍາຍແນວທາງນະໂຍ ບາຍຂອງພັກ, ແຜນພັດທະນາເສດຖະກິດ-ສັງ ຄົມຂອງລັດ ໂດຍສະເພາະແມ່ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ກໍ່ຄືມະຕິກອງປະຊຸມໃຫຍ່ຂອງອົງຄະນະພັກເມືອງ.
ການລົງເຄື່ອນໄຫວເຮັດວຽກຄັ້ງນີ້ໄດ້ເຂົ້າຮ່ວມເຮັດວຽກ ແລະ ສໍາພາດການນໍາຂອງແຂວງ ກ່ຽວກັບຜົນສໍາເລັດອັນພົ້ນເດັ່ນ ທີ່ແຂວງຍາດມາໄດໃນໄລຍະເຄິ່ງສະໄໝຜ່ານມາ, ບັນຫາທີ່ຈະຕ້ອງສຸມໃສ່ແກ້ໄຂໃນໄລຍະທ້າຍສະໄໝ ແລະ ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ຢູ່ພາຍໃນແຂວງຊຽງຂວາງ, ພ້ອມທັງເກັບກໍາຕີລາຄາສະພາບແນວຄິດຂອງສະມາຊິກພັກ, ພະນັກງານ ແລະ ປະຊາຊົນ ພາຍໃນແຂວງ ໃນເງື່ອນໄຂທີ່ປະເທດພວກເຮົາພົບຄວາມຫຍຸ້ງຍາກ
ທາງດ້ານເສດຖະກິດ, ອັດຕາເງິນເຟີ້, ຄ່າຄອງຊີບສູງ ແລະ ວິທີແກ້ໄຂໃນຕໍ່ໜ້າ. ພ້ອມນັ້ນໄດ້ເຂົ້່າຮ່ວມເຮັດວຽກສໍາພາດຫົວໜ້າຄະນະໂຄສະນາອົບຮົມແຂວງ ຕໍ່ຜົນງານການເຄື່ອນໄຫວວຽກງານໂຄສະນາອົບຮົມແຂວງຊຽງຂວາງ ໃນໄລຍະ 6 ເດືອນຜ່ານມາ ມີອັນພົ້ນເດັ່ນ, ຂໍ້ສະດວກ-ຫຍຸ້ງຍາກ ແລະ ທັດສະນະຄວນສ້າງ
ການຫັນປ່ຽນຂອງວຽກງານໂຄສະນາອົບຮົມໃນຕໍ່ໜ້າ. ຈາກນັ້ນ ໄດ້ເຂົ້າຮ່ວມເຮັດວຽກສໍາພາດການນໍາຂອງເມືອງ ໃນການນໍາພາ-ຊີ້ນໍາຂອງອົງຄະນະພັກເມືອງ ຕໍ່ວຽກງານການພັດທະນາຂອງເມືອງຜ່ານໄລຍະທ້າຍສະໄໝ, ຕີລາຄາສະພາບແນວຄິດຂອງສະມາຊິກພັກ, ພະນັກງານ, ປະຊາຊົນ ພາຍໃນເມືອງ ຕໍ່ບົດບາດການນໍາພາຂອງພັກ ແລະ ການຄຸ້ມຄອງຂອງລັດ ມີອັນພົ້ນເດັ່ນ, ບັນຫາຫຍຸ້ງຍາກ, ບັນຫາກະທົບຕໍ່ແນວຄິດ ແລະ ສິ່ງທ້າທາຍ ທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ໜ້າ.
ຂຽນໂດຍ: ສາຍທອງ