ກອງປະຊຸມໃຫຍ່
ຜູ້ແທນອົງຄະນະພັກເມືອງຜາໄຊ ສະໄໝທີ VI
ກອງປະຊຸມໃຫຍ່ຜູ້ແທນອົງຄະນະພັກເມືອງຜາໄຊ ສະໄໝທີ VI ໄດ້ໄຂຂຶ້ນໃນລະຫວ່າງວັນທີ 24-25 ມີນາ 2025 (ດໍາເນີນເປັນເວລາ 1 ວັນເຄິ່ງ) ທີ່ຫ້ອງປະຊຸມໃຫຍ່ຫ້ອງວ່າການເມືອງຜາໄຊ ແຂວງຊຽງຂວາງ ໂດຍການເປັນປະ ທານຂອງສະຫາຍ ບຸນມາ ສຸຍະວົງ ກໍາມະການພັກແຂວງ ເລຂາຄະນະບໍລິຫານງານພັກເມືອງ, ເຈົ້າເມືອງ-ເມືອງຜາໄຊ, ໂດຍການເປັນກຽດເຂົ້າຮ່ວມຂອງສະຫາຍ ບຸນຈັນ ສີວົງພັນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ-ແຂວງຊຽງຂວາງ, ມີຜູ້ແທນສົມບູນເຂົ້່າຮ່ວມທັງໝົດ 94 ສະຫາຍ, ຍິງ 4 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດ 1.047 ສະຫາຍ ແລະ ແຂກຖືກເຊີນ 19 ສະຫາຍ, ຍິງ 2 ສະຫາຍ.
ກອງປະຊຸມໄດ້ຮັບຮອງເອົາເນື້ອໃນບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V (2020-2024) ແລະ ທິດທາງແຜນການ 2025-2029, ບົດສໍາຫຼວດການນໍາພາລວມ ຂອງຄະນະບໍລິຫານງານພັກເມືອງ ສະໄໝທີ V ໂດຍໄດ້ຍົກໃຫ້ເຫັນເຖິງຜົນສໍາເລັດໃນການຈັດຕັ້ງປະຕິບັດຕະຫຼອດໄລຍະ 5 ປີຜ່ານມາ ເປັນຕົ້ນແມ່ນການ ຈັດຕັ້ງປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ກົດໝາຍຂອງລັດ ຢ່າງຖືກຕ້ອງ ແລະ ເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ມະຕິກອງປະຊຸມໃຫຍ່ ຄັ້ງທີ V ອົງຄະນະພັກເມືອງຜາໄຊ ຢ່າງກວ້າງຂວາງຕໍ່ເນື່ອງ ເຮັດໃຫ້ສັງຄົມມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ມີຄວາມສາມັກຄີເປັນປຶກແຜ່ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ. ເມືອງຜາໄຊ ປະກອບມີ 3 ກຸ່ມບ້ານ, ມີ 31 ບ້ານ, ມີພົນລະເມືອງ 13.778 ຄົນ, ຍິງ 6.681 ຄົນ ໃນນັ້ນ: ເຜົ່າລາວລຸ່ມ ກວມ 47,82 %, ເຜົ່າມົ້ງ ກວມ 35,56%, ເຜົ່າກຶມມຸ ກວມ 5,94%, ເຜົ່າໄຕດໍາ ກວມ 10,55% ແລະ ເຜົ່າອື່ນໆ ກວມ 0,14%. ເສດຖະກິດຂອງເມືອງໄດ້ມີການຂະຫຍາຍຕົວສະເລ່ຍ 6%ຕໍ່ປີ, ທຽບໃສ່ແຜນ ການ 5 ປີ ຫຼຸດລົງ 1,3%, ລວມຍອດລາຍຮັບບັນລຸ 632.94 ຕື້ກີບ, ສະເລ່ຍລາຍຮັບໃສ່ພົນລະເມືອງບັນລຸ 11.713.153 ກີບ/ຄົນ/ປີ ຫຼື ເທົ່າກັບ 585,65 ໂດລາ/ຄົນ/ປີ. ສໍາລັບຄາດໝາຍ, ທິດທາງແຕ່ປີ 2025-2029 ສູ້ຊົນເຮັດໃຫ້ເສດຖະກິດຂະຫຍາຍຕົວໃນລະດັບ 6,3% ຕໍ່ປີ, ລວມຍອດລາຍຮັບໃຫ້ບັນລຸ 822,82 ຕື້ກີບ, ສະເລ່ຍລາຍຮັບຕໍ່ຫົວຄົນໃຫ້ໄດ້ 15.227.098 ກີບຕໍ່ຄົນຕໍ່ປີ ຫຼື ເທົ່າກັບ 761,35 ໂດລາ/ຄົນ/ປີ. ພ້ອມນັ້ນກອງປະຊຸມ ຍັງໄດ້ຮັບຟັງການລາຍງານຕົວແບບການຜະລິດເຂົ້າໄກ່ນ້ອຍຕົນກໍາເນີດ IG ບ້ານຫໍກາງ ແລະ ການຕໍ່າຫູກບ້ານທາງຊຽງເໜືອ ເຮັດໃຫ້ກອງປະຊຸມມີບັນຍາດກາດຟົດຟື້ນດີ.
ຈາກນັ້ນ, ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕ ຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກເມືອງຜາໄຊ ສະໄໝທີ VI ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້, ເຊິ່ງຄັດເລືອກເອົາຄະນະບໍລິຫານງານພັກເມືອງຜາໄຊ ສະໄໝທີ VI ຈໍານວນ 25 ສະຫາຍ, ຍິງ 3 ສະຫາຍ, ຄັດເລືອກເອົາຜູ້ແທນສົມບູນ ຈໍານວນ 15 ສະຫາຍ, ຍິງ 2 ສະຫາຍ ແລະ ຜູ້ແທນສໍາຮອງ ຈໍານວນ 4 ສະຫາຍ, ຍິງ 0 ສະຫາຍ ເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ສະໄໝທີ IX.
ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກເມືອງຜາໄຊ ສະໄໝທີ VI ໄດ້ເປັນເອກະສັນເລືອກເອົາຄະ ນະປະຈໍາພັກເມືອງ 7 ສະຫາຍ, ຍິງ 1 ສະຫາຍ, ໂດຍເລືອກເອົາສະຫາຍ ຄໍາຫຼ້າ ແກ້ວດາວັນ ເປັນເລຂາຄະນະບໍລິຫານງານພັກເມືອງ, ສະຫາຍ ແກ້ວອຸໄທ ເດດສົມສັກ ແລະ ສະຫາຍ ຄໍາສະຫວາດ ສະຕິທອງ ເປັນຮອງເລຂາຄະນະບໍລິຫານງານພັກເມືອງ, ເລືອກເອົາສະຫາຍ ແກ້ວອຸໄທ ເດດສົມສັກ ເປັນປະທານຄະນະກວດກາພັກເມືອງ, ສະຫາຍ ສາຍທອງ ມະນີພູມຫຼວງ ແລະ ສະຫາຍ ຕຸ້ຍ ຄໍາສະຫວາດ ເປັນຮອງປະທານຄະນະກວດກາພັກເມືອງ.
ໃນຕ້ອນທ້າຍກອງປະຊຸມໄດ້ຮັບຟັງການໂອ້ລົມຈາກ ສະຫາຍ ບຸນຈັນ ສີວົງພັນ ກໍາມະການສູນກາງພັກ, ເລຂາຄະ ນະບໍລິຫານງານພັກແຂວງ, ເຈົ້າແຂວງ-ແຂວງຊຽງຂວາງ ເຊິ່ງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ ສະໄໝທີ V ທີ່ໄດ້ເອົາໃຈໃສ່ນໍາພາ-ຊີ້ນໍາສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ປະຕິບັດໜ້າທີ່ການເມືອງເຊິ່ງຍາດໄດ້ຜົນສໍາເລັດຫຼາຍດ້ານ. ພ້ອມນັ້ນ ຍັງໄດ້ສະແດງຄວາມເປັນຮ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງຈະໄດ້ສືບຕໍ່ປັບ ປຸງແກ້ໄຂໃນຕໍ່ໜ້າ ແລະ ໄດ້ຮຽກຮ້ອງໃຫ້ຄະນະບໍລິຫານງານພັກເມືອງຊຸດໃໝ່ ຈົ່ງເອົາໃຈໃສ່ໃນການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກເມືອງຜາໄຊ ໃຫ້ປະກົດຜົນເປັນຈິງ.
ໂດຍ: ສາຍທອງ ວື່ໄຊຫວັງ