ຊຸກຍູ້ວຽກງານຮອບດ້ານຢູ່ບ້ານແຮກສຽ່ວ

ລາຍລະອຽດ

ສ້າງຂື້ນເມື່ອ ວັນສຸກ, 16 ມີຖຸນາ 2023 02:27

ຂຽນໂດຍ ຄອຂ ຊຽງຂວາງ

    ວັນທີ 9 ມິຖຸນາ 2023 ຜ່ານມານີ້ ຄະນະໂຄສະນາອົບຮົມແຂວງ ໄດ້ລົງເຄື່ອນໄຫວຢ້ຽມຢາມຊຸກຍູ້ວຽກງານຮອບດ້ານຢູ່ບ້ານຫໍສິມຖ້ໍາຜຸກ ເມືອງຜາໄຊ (ບ້ານແຮກສ່ຽວຂອງຄະນະໂຄສະນາອົບຮົມແຂວງ) ນໍາພາໂດຍ ສະຫາຍ ນາງ ພວງພະຈັນ ມູນທະວົງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍຄະນະ, ພະນັກງານຄະນະໂຄສະນາອົບຮົມແຂວງ  ແລະ ທິມງານຂອງເມືອງຜາໄຊ ເຊິ່ງປະກອບມີສະຫາຍ ສຸດໃຈ ສີປະເສີດ ຄະນະປະຈໍາພັກເມືອງ ຮອງເຈົ້າເມືອງຜາໄຊ, ສະຫາຍ ນາງ ສຸກສະໄໝ ດວງດາລາ ກໍາມະການພັກເມືອງ, ຫົວໜ້າຄະນະໂຄສະນາອົບຮົມເມືອງຜາໄຊ, ເຂົ້າຮ່ວມມີຫົວໜ້າໂຮງຮຽນ, ຄະນະພັກກຸ່ມສົມບູນ,

ພະນັກງານກໍ່ສ້າງຮາກຖານທີ່ປະຈໍາຢູ່ກຸ່ມສົມບູນ, ຄະນະພັກ-ອົງການປົກຄອງບ້ານ, ຫົວໜ້າສິງຊາວ ແລະ ປະຊາຊົນພາຍບັນດາເຜົ່າພາຍໃນບ້ານໄດ້ຕ້ອນຮັບຢ່າງອົບອຸ່ນ, ໃນພິທີໄດ້ຮັບຟັງການລາຍງານສະພາບການພັດທະນາເສຖະກິດ-ສັງຄົມຂອງບ້ານ ໃນໄລຍະ 1 ປີຜ່ານມາ ຈາກສະຫາຍ ດ່າທໍ່ ເລຂາໜ່ວຍພັກ, ນາຍບ້ານຫໍສິມຖໍ້າຜຸກໃຫ້ຮູ້ວ່າພົນລະເມືອງຂອງບ້ານມີທັງໝົດ 449 ຄົນ, ຍິງ 194 ຄົນ, ປະກອບມີ 2 ເຜົ່າຄື: ເຜົ່າລາວລຸ່ມ ແລະ ເຜົ່າມົ້ງ, ມີ 79 ຫຼັງຄາເຮືອນ, ມີ 70 ຄອບຄົວ, ອາຊີບຫຼັກແມ່ນປູກຝັງ ແລະ ລ້ຽງສັດ, ການພັດທະນາເສຖະກິດມີການຂະຫຍາຍຕົວຢ່າງຕໍ່ເນື່ອງ ລວມຍອດລາຍຮັບພາຍໃນບ້ານທັງໝົດ 4.774.780.000 ສະເລ່ຍລາຍຮັບຕໍ່ຫົວຄົນໄດ້ 10.634.000 ກີບຕໍ່ຄົນຕໍ່ປີ. ສະພາບພາຍໃນບ້ານມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນມີຄວາມສາມັກຄີປອງດອງ, ການຜະລິດເປັນສິນຄ້າຂອງປະຊາຊົນໄດ້ຮັບການຊຸກຍູ້ສົ່ງເສີມ ແລະ ພັດທະນາດີຂື້ນ, ເຮັດໃຫ້ຄວາມທຸກຍາກຂອງປະຊາຊົນຫຼຸດລົງເປັນກ້າວໆ.

   ເພື່ອເຮັດໃຫ້ບ້ານຫໍສິມຖໍ້າຜຸກກາຍເປັນບ້ານພັດທະນາ, ບ້ານທີ່ເຂັ້ມແຂງຮອບດ້ານ, ຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນແຕ່ລະໄລຍະ ສະຫາຍ ນາງ ພວງພະຈັນ ມູນທະວົງ  ກຳມະການພັກແຂວງ ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ ແລະ ສະຫາຍ ສຸດໃຈ ສີປະເສີດ ຄະນະປະຈໍາພັກເມືອງ ຮອງເຈົ້າເມືອງຜາໄຊ ໄດ້ຜັດປ່ຽນກັນມີຄໍາເຫັນໂອ້ລົມ ແລະ ໃຫ້ທິດຊີ້ນໍາບາງບັນຫາຕົ້ນຕໍແມ່ນ:

1. ເພີ່ມທະວີການສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີ, ໃຫ້ເປັນປຶກແຜ່ນໂດຍຕິດພັນການຫັນແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຂັ້ນຕ່າງໆຂອງພັກ, ລະບຽບກົດໝາຍຂອງລັດ, ມະຕິ, ຄໍາສັ່ງ, ນິຕິກໍາຕ່າງໆຂອງພັກ-ລັດ, ເພີ່ມຄວາມສາມັກຄີພາຍໃນພັກໃຫ້ໜັກແໜ້ນ, ຍຶດໝັ້ນ ແລະ ປະຕິບັດຫຼັກການລວມສູນປະຊາທິປະໄຕຂອງພັກ, ແບບແຜນການນໍາພາ ແລະ ວິທີເຮັດວຽກຂອງຄະນະພັກ-ອົງການປົກຄອງບ້ານ ໃຫ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່.
2. ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ຍົກສູງສະຕິລະວັງຕົວຕໍ່ກົນອຸບາຍຂອງພວກກຸ່ມຄົນບໍ່ຫວັງດີ, ຄຸ້ມຄອງ ແລະ ຕິດຕາມພົນລະເມືອງເຂົ້າ-ອອກຢ່າງເຂັ້ມງວດ, ເປັນເຈົ້າການຕອບຕ້ານການໂຄສະນາບິດເບືອນ, ການໃສ່ຮ້າຍປ້າຍສີຕໍ່ການນໍາພາຂອງພັກ-ລັດ.
3. ການປົກປັກຮັກສາຊັບພະຍາກອນທໍາມະຊາດໃຫ້ຢືນຍົງ ໂດຍສະເພາະແມ່ນປ່າສະຫງວນຂອງບ້ານ, ປ່າຍອດນໍ້າ, ການຊີ້ນໍາພັດທະນາເສຖະກິດສັງຄົມ ເປັນຕົ້ນແມ່ນການຊຸກຍູ້ ສົ່ງເສີມການຜະລິດເປັນສິນຄ້າຂອງປະຊາຊົນໃຫ້ຫຼາຍຂຶ້ນ ໂດຍສະເພາະແມ່ນການປູກຝັງ ແລະ ລ້ຽງສັດ ເພື່ອແກ້ໄຂຄວາມທຸກຍາກຂອງປະຊາຊົນ.
4. ເອົາໃຈໃສ່ໃນການກໍ່ສ້າງໜ່ວຍພັກປອດໃສ, ເຂັ້ມແຂງໜັກແໜ້ນ, ການກໍ່ສ້າງຂະຫຍາຍສະມາຊິກພັກໃຫ້ມີຈໍານວນເພີ່ມຂຶ້ນ ແລະ ນໍາພາອົງການຈັດຕັ້ງມະຫາຊົນ: ຊາວໜຸ່ມ, ແມ່ຍິງ ໃນຖານະເປັນເສນາທິການໃຫ້ແກ່ຄະນະພັກ ເອົາໃຈໃສ່ເຄື່ອນໄຫວຕາມພາລະບົດບາດ, ສິດ, ໜ້າທີ່ໃຫ້ເປັນຂະບວນການຟົດຟື້ນ ແລະ ແຂງແຮງກວ່າເກົ່າ.
5. ເອົາໃຈໃສ່ຊຸກຍູ້ຊ່ວຍເຫຼືອຄອບຄົວ ທີ່ມີການພັດທະນາໜ້ອຍ, ສະເໜີໃຫ້ເມືອງ ແລະ ພະນັກງານລົງກໍ່ສ້າງຮາກຖານ ຈົ່ງຊ່ວຍຊີ້ນໍາເປັນພິເສດ ໂດຍສະເພາະແມ່ນ 03 ຄອບຄົວທີ່ຍັງທຸກຍາກ, ເພື່ອໃຫ້ຫຼຸດພົ້ນອອກຈາກຄວາມທຸກຍາກ.

    ເນື່ອງໃນໂອກາດສໍາຄັນດັ່ງກ່າວ ຄະນະໂຄສະນາອົບຮົມແຂວງ ໃນນາມເປັນສ່ຽວກັບບ້ານຫໍສິມຖໍ້າຜຸກ ກໍໄດ້ມອບງົບປະມານ ແລະ ເຄື່ອງຊ່ວຍເຫຼືອຈໍານວນໜຶ່ງ ໃຫ້ແກ່ຄະນະພັກ-ອົງການປົກຄອງບ້ານ ແລະ ປະຊາຊົນພາຍໃນບ້ານ ເຊິ່ງປະກອບມີ: ເຄື່ອງໃຊ້ເຮືອນຄົວ, ເຄື່ອງນຸ່ງຮົ່ມ, ເກີບແພ, ຖົງມື ແລະ ເກືອ, ລວມເປັນມູນຄ່າທັງໝົດ 39,929,000 ກີບ.

ໂດຍ: ສີຍອງ ພອນທະຈັນ

• ຕໍ່ໄປ >